Shillong, Rymphang 24 : U Symbud Myntri Rangbah ka jylla ba dei peit ïa ka tnad Transport u Bah Sniawbhalang Dhar u la pyntip ha Iing Dorbar ba ka Shillong Business cum Tourism and Cultural Centre kaba la tei ha ka ba don ka MTC barim ha Khyndailad ka la dep kumba 86 persen ei ei mynta ïa kaba ki khmih lynti ban ïoh plie noh ha u Jylliew mynta u snem.
Haba jubab halor ka cut motion, u Symbud Myntri Rangbah u la ong ba ka ïa kane ka projek la sdang ha u snem 2021 ban pyndonkam ïa ka jaka iew kaba heh 1.76 akar. “Ka jingthmu jong kane ka projek ka long ban pyndonkam pura ïa kane ka jaka kaba paka ba kan don naduh ki jaka buh ophis, ki jaka pynlong jingïalang, ki jaka bam, ki jaka khaii, bad kiwei kiwei ki jingdonkam kiba ïadei bynta lang,” u la ong.
Ka kynhun myntri ka la mynjur ïa ka jinglut kaba la antad haduh ?216.347 klur, ha kaba ka ram jong ka HUDCO kaba nyngkong la buh ba kan long ?154.213 klur, nangta ?45 klur na ka Shillong Smart City Project, bad ?17.13 klur na ka sorkar jylla.
Na ka liang u Symbud Myntri Rangbah u la pynshai ruh ba ïa ka bynta jong ka ram la pynkut ha ka ?115.66 klur, ha kaba ka jylla ka pyndap ïa ka jingduna, bad ba ka Meghalaya ka ieng kum ka nongbahkhlieh.
“Ka jingsiew ïa ka ram ka la sdang bad kam shym la don kano kano ka jingbym siew ïa ka ram haduh mynta. Haduh u bnai Nohprah 2025, ka jingsiew kaba sah ka long ?1,08,58,00,955 tyngka.,” u la ong da kaba bynrap ba ka ram kaba 12 snem kan kut noh ha u snem 2036.
Shuh shuh u la ïathuh ba la dep ruh ban ïa soi ïa ka soskular kaba saw bynta ha ka 10 tarik u Rymphang, 2023, hapdeng ka sorkar, ka MTC, ka MUDA bad ka Shillong Smart City Ltd.
Ïa ka tender la ai sha u nongkhliehdor ba rit tam da ?211.871 klur kynthup ka GST.
Kane ka jingtei ka kynthup ïa ki hynriew mala baroh arliang ha ka jingïar kaba 19,057.68 sqm nalor ka jaka pynieng kali kaban ngiam haduh 196 tylli ki kali bad haduh 3,756.1 sqm ka jaka ba thylli.
