Kumba 300 ngut ei ei ki samla kiba wan sha ka Recruitment Drive ba la pynlong da ka MSSDS

Mawkyrwat, Rymphang 24: Ka Meghalaya State Skill Development Society (MSSDS), kaba hapoh jong ka Labour Department, Employment bad Skill Development, jong ka Sorkar Meghalaya, mynta ka sngi ka 24 tarik u Rymphang, 2026 ka la pynlong ïa ka Recruitment Drive ha Mawkyrwat Block kaba hap hapoh ka South West Khasi Hills District.
Ha kane ka jingïalang la sakhi lyngba ka jingïashim bynta jong ki 300 ngut ki samla shynrang bad kynthei na kylleng ki shnong kiba wan ban register ïa lade ha ki jait training bapher bapher, khamtam ki samla bym donkam don jam, ki nongwad kam kiba kwah ban ïoh kam ban leit trei la ka long hapoh la ka jong ka jylla, ne shabar jong ka jylla, bad wat shabar jong ka ri India haba ki la don kumba 100 ngut ei ei kiba la rung ban shah shim ïa ki interview.
Ym tang kata, lah ban kdew ba kane ka jingpynrung kyrteng ka dei ruh shibynta jong ka jingthmu ba kham pynngam jylliew ïa ki jingmut jingpyrkhat, ha kaba ïa kane ka Recruitment Drive la pynlong ruh ha kylleng ki district bapher bapher ban kyntiew ïa ka ïoh kam ïoh jam bad ban pynkhlaiñ ïa ki jingïadei hapdeng ki samla nongwad kam bad ki nongprad lynti kum ki advisor, bad lyngba ki jingthaw lad thaw lynti lem ïa ki khun samla kiba don shisha ka jingthrang ban trei ïa kam ba ki kwah kan long kaba jop.
U Bah B. Mawlong, IAS, Deputy Commissioner ka South West Khasi Hills District kum u kongsan ula wan ban ïashimbynta ha kane ka jingïalang ban plie paidbah ruh ïa kane Recruitment Drive. Ha ka jingkren jong u, ula pynshlur ïa ki samla ba haba ki don ïa kum kane program ba ka sorkar lyngba ka Meghalaya State Skill Development Society (MSSDS) ka thmu, kum ki samla kim dei ban pynlehnoh ei hynrei ki dei ban mih shakhmat da kaba kin kut jingmut ban trei ïa la ka kam ryngkat ka jingaiti lut ïalade ha manla ka lad jinghikai khnang ba kin lah ban jop bad ban pynurlong ïa ki thong jong ki.
U la pynpaw ruh ba kum kine ki rynsan ki long kum ka jingpynïasoh hapdeng ki nongwad kam bad ki nongpyntreikam, kaba ïarap ban pyndap ïa ki jingduna ha ki jingtip bad ban pynïar ïa ki lad ban ïoh-kam hapoh la ka jong ka jylla, ne shabar jong ka jylla, bad wat shabar jong ka ri India.
“Wat ong ba ngi im ha ki sngi jong ka jingkyrduh kam, hynrei la phi donkam mon ban trei trei ïa kino kino ki jait kam da kaba long borabor kiba skhem ha ka jingmut jingpyrkhat, trei shitom la ki long ki kam kiba rit ne kiba khraw bad aiti lut”, ai mynsiem u Bah Mawlong ïa ki samla kiba la wan ha ka jingïalang.
Kiwei kiba la donlang ha kane ka jingïalang ki kynthup ïa ka Kong M. Tariang, Administrative Officer ka Meghalaya State Skill Development Society, Shillong, u bah V.W. Nongsiej uba dei u Managing Director bad u Nongseng jong ka Gracy & Co. Institute of Information Technology Society, Mawkyrwat, ka kong Kharlyngdoh, Skill Development Officer ka South West Khasi Hills District kaba la pynïaid ïa ka jingïalang bad ka kong. Pynsuklang Myrthong, Career Advisor uba la ai ka jingkhublei halor kane ka prokram kaba mynta ka sngi.