Da 93 ron pynliem ka Nongmensong ïa ka Langsning XI ha ka SCA Cricket League Super Division 2026

SHILLONG, Rymphang 24: Ka Nongmensong Cricket Club ka la pynliem noh ïa ka Langsning XI Cricket Club da 93 ron ha ka Group A jong ka lympung Shillong Cricket League Super Division 2026 ba la pynïaid da ka Shillong Cricket Association (SCA), hynne ka sngi Ba-ar ha Polo.
Haba tied nyngkong hadien ba jop ïa ka jingkynting pisa (toss) ka Nongmensong ka la buh ïa ka nongrim kaba skhem da 220 ron bad hap 7 wiket ha ki 45 ober. Kiba la lamkhmat ha ka tied ki long u Pushkar Raj Singh (60 ron naki 83 bol) bad u Anish Charak (56 ron naki 53 bol).
Na ki nongkawang bol jong ka Langsning XI CC, u Ronnie Nongrum u la khur 3/20 naki 3 ober, katba u Prince Ray u la khur 1/31 naki 9 ober.
Hynrei haba pyrshang beh ïa ka thong ka Langsning XI ka la shah pynkhyllem noh baroh 10 wiket tang na ka bynta 127 ron haki 35.4 ober, bad dei tang u Enrick Suchiang (26 ron naki 28 bol) bad u Aaron A Nongrum (23 ron naki 34 bol) kiba la kham pawkhmat ha ka tied.
U Anish Charak u la pyndep ïa ka pali bol jong ka Nongmensong da kaba khur 3/23 naki 9 ober kaba pynlong ïa u ban khur ïa ka khusnam Player of the Match, katba u Ram u la khur 2/24 naki 5 ober.
Haba phai sha ka jingïalehkai ha ka Group B kaba la long ha ka sngi Nyngkong, ka Young Guns Cricket Club ka la pynliem ïa ka Lok Bhavan CC da 4 wiket.
Hadien ba ka la lah ban weng noh ïa baroh 10 wiket jong ka Lok bhawan na ka bynta 169 ron haki 32.3 ober, ka Young Guns ka la kamai 170 ron da kaba hap tang 6 wiket haki 32.5 ober ban pynskhem ïa ka jingjop.
U Angkit Tamang u la tyngshaiñ ha baroh arliang, da kaba khur 3/29 naki 8 ober ha ka boling bad nangta u la noh synñiang 84 ron (95 bol) haba beh ïa ka thong, kaba pynlong ïa u ban khur ïa ka khusnam Player of the Match.