Jowai, Rymphang 24: Ka Goodwill Mupliang SC kala jop ïa ka Tympang CC da 9 wicket ha ka jingïalehkai ba ar mynta ka sngi 24 tarik u Rymphang haka jingïakhun jong ka District Cricket League 2026 bala pynïaid da ka West Jaiñtia Hills District Cricket Association.
Ha ka jingkynting pisa la jop da ka Tympang CC kaba la jied ban tied nyngkong da kaba kamai 135 run na ki 35 Over. Na ka liang u Wallambok Nongkhlaw ula kamai 27 run na ki 35 bol kynthup 4 tylli ki 4 Run. U Kenny Phawa (C) ula kamai 25 run khlem out na ki 58 bol kynthup ïa 3 tylli ki 4 run. U Sandy Kharshandi u nongkawang bol ka Goodwill Mupliang SC ula ïoh ban khur haduh 4 Wickets na ki 7 over.
Ka Goodwill Mupliang SC haba wan ban beh ïa ka thong kala lah ban pynjop da kaba kamai 136 run bad hap tang shi wicket ha ki 10.5 over. U Byforcestar Dhar ula kamai marwei haduh 70 run khlem out na ki 36 bol kynthup 2 tylli ki 6 runs bad 13 tylli ki 4 Run. U Sandy Kharshandi ula kamai 36 run khlem out na ki 19 bol kynthup 2 tylli ki 6 run bad 4 tylli ki 4 Run. U Kyntudame Dkhar u nongkawang bol jong ka Tympang CC ula ïoh khur 1 Wickets na ki 2 Over.
U Sandy Kharshandi uba dei u nongïalehkai jong ka Goodwill Mupliang SC, ula ïoh ïa ka naam Man of the Match mynta ka sngi.
La pyntip ka jingïalehkai lashai ka sngi 25 tarik kan long hapdeng ka Shangpung CC pyrchah ïa ka Evergreen Mukhla Mission naduh ka por 9 baje mynstep.
