Nongstoiñ, Rymphang 22 : Na ka bynta ban pynkhlain pat ïa ka party Congress lane Party Indian National Congress (INC) ha ka ri hi baroh kawei, ka party ka la pyllait paidbah ïa ka prokram kaba la tip kum ka Sangathan Srijan Abiyan ha baroh kawei ka Ri India.
Kane kajuh ka prokram la sakhi sa ha Nongstoiñ da ka jingwan kyrpang jong u Observer ka All India Congress Committee u Sachin Naik, observer AICC, Secretary barim AICC, Senior Vice President Maharashtra Pradesh Congress Committee, kaba la pynlong ha Congress Bhavan Nongstoiñ.
Kine ki heh nongïalam jong ka party ki la ïoh ban pynlut por bad ki lad pathai khubor ha ka janmiet sngi palei ha Congress Bhavan, ha kaba na ka liang u Sachin Naik u la ong ba ka jingwan jong u sha Nongstoiñ bad West Khasi Hills, ka long ban pyntreikam ïa katei ka prokram da kaba yn thung bad jied thymmai noh ïa baroh ki District President.
U la ong ruh ba ka All India Congress Committee ka la pyndep ïa kane ka bynta ban pynthymmai ïa ki District President ha kiwei kiwei ki Jylla jong ka Ri India. Kum u Observer mynta u don ha West Khasi Hills bad un shong haduh 7 sngi ha kaba un leit sha manla ki Block.
U la ong ba un pynlut por khnang ha ban sa ïakynduh ruh ïa ki nongtrei ka Party, na ka bynta ban sngap ïa ka jingpynpaw ka jong ki hala ki jingsngew, khnang ba ka jingjied ïa u President kan long kaba khuid ba suba bad kaba ïaid beit iaid ryntih.
Hadien ba u la dep ban bishar bniah un sa phah ïa ka kaiphod jong u sha ka All India Congress Committee, ha kaba ka AICC kan sa pynbna paidbah ïa u President jong manla ki District.
Kane ka long ruh ban pyntikna ba u District President jong ka Party un long u ba kitkhia ïa ka kam jong ki Block, ha kaba un sa dei ruh u ba kongsan tam ha ka ban shim ïa kino kino ki rai kiba ïadei bad ka kam Party, ki kam election bad kiwei kiwei de.
