Nongstoiñ, Rymphang 22: Ka ding kaba klang ka la bam duh ïa ka ïing jong I kong Sara Ryntong na ka shnong Nongtraw West Khasi Hills District. Kane ka jingjia ka la jia ha ka step jong ka 21 tarik mynta u bnai ha ka por kumba 4 baje ei ei mynstep.
Ki tyllong khubor ki ïathuh ba kane ka jingjia ka la jia ha ka por ba baroh dkhot jong ka ïing ki dang ïoh thiah, ha kaba ka ding ka la sdang ban klang na kamra shet.
Hadien ba ki la ïoh sngew ïa ka jingsawa jong ka jingpluh, ki la mih ban pyrta jingïarap na ki para marjan, kiba la pyrshang ban mareh bad pynsted ki jingïarap. Hynrei ka ding kaba la klang shyrkhei ka la dep ban ïoh bam duh lut khait ïa ki jingdon jingem.
Ki tiar ba la duh noh ki long naduh u khaw, u kba, ki khiew ki pliang, ki jaiñ ki nep, kumjuh ruh ka pisa, ha kaba ka jingduhnong la antad ba ka la kot sha ki lak tyngka. Ha kane ka jingjia pluh ding, ym shym la don kano kano ka jingjia ba sngewsih ïa ki mynsiem briew.
