Shimkhia ki pulit ban tehlakam ïa ki thuk thuk kiba ïakop mareh manla ka sngi u Blei

Nongpoh, Rymphang 22: Ki pulit ka Ri-Bhoi mynta ka sngi kila mih sha surok ban tehlakam ïaki thuk thuk kiba ju mlien ban pynlong haka ïakop pynsted man ka sngi u Blei kaba la pynthud shisha ïaka leit ka wan bad buh ruh ka jingsyier ïaki paidbah.
Kane ka jinghiar jong ki kynhun ñiah thuk thuk man ka sngi u Blei khamtam ban ïa pynher sted ha surok bah National Highway haka sngi u Blei kala wanrah shisha ka jingbitar ïa kiba bun ba lang, namar ka jingshitkhlieh ka rukom ñiah khyllew kaba pyntieng pynsyier ïakiba bun ki nongleit nongwan khamtam ki kynthei khynnah.
Kumta ban tehlakam ïa kum kine ki khynnah naka liang ki pulit kila bat ïaki thuk thuk kiba ju mlien ban pynher sted bad kumjuh ruh ki bym burom ïaki aiñ ñiah kali, ki bym deng ïaki helmet namar kane ka jingleh jong ki kam buh jingsyier tang haki hynrei ïaki paidbah ba bun namar u surok bah national highway u dei u ba bun ki paidbah ki leit ki wan ha shilynter bad naka liang ki pulit kila daiñ kuna ryngkat ka jingmaham.
Haka juh ka por kum ka jingpynkylluid ïa u surok bah bad ban lait na kano kano ka jingjia aksiden khamtam haka por mynmiet naka liang ki pulit kila leit ruh ban beh krad ïa ki trok kiba ju ieng beaiñ ha surok bah national highway 6 haka thaiñ Umran bad Jorabat bad kiwei kiwei ki jaka.
Kumta naka liang ki pulit kila kyrpad ïa ki nongshong shnong ban bud ryntih ïa ki kyndon pynïaid kali bad ban ïatreilang bad ki kynhun pulit namar ki surok kiba shngaiñ ki dei ka kamram jong baroh.