Jowai, Rymphang 22: Ka Jaiñtia National Council (JNC) Western Zone ha ryngkat ka JNC Lakseiñ Circle, ba la ïalam da u President WZ u Hamehi Bamon, ki la leit ban jurip hynnin ka sngi saitjaiñ ïa ka rukom siang surok haka shnong Khatkhasla, Pshiar kiba dang hap hapoh ka West Jaiñtia Hills.
Ha katei ka jingleit jurip ïaka surok kaba dang shu shna thymmai bad kaba la siang rong (blacktop) kaba jrong naduh ka jingkieng Rud Myntang Tih Wieh haduh ka Jingkieng Rjiang (Pshiar), kaba jrong kumba 4.8 km bad ka jinglut kaba kot sha ka 4.57 klur tyngka.
Halor kane ka jingïaid shaphrang ka kam na ka liang ka seng ka pynpaw ka jingsngewnguh ïa u MLA ka thaiñ, u ma Nujorki Sungoh, uba la trei shitom ban pyndep ïa kane ka surok, hadien ka jingkyrpad kaba la buh da ka seng ha ki snem ba la dep haka 22 tarik u November, 2024. Ha kaba u MLA ula shimkhia na ka bynta ka bha ka miat jong ka imlang sahlang.
Shuh shuh ka seng ka la kyntu ïa ki nongpyntrei surok naduh ki contractor ba kin pynthikna ïa ka surok bad ka rukom shna ka dei ban long kaba bha, namar ba kitei ki surok kiba don ha ki bynta jong ka khappud.
U President ka JNC WZ ula kyrpad ruh ïa u MLA ba un phai khmat shuh shuh ïa ka rukom treikam sha ki thaiñ khappud kiba ïakynduh ïa ki jingeh ba bun, da kaba kyntu ban bteng ïa kane ka surok shaduh ka shnong Moolber.
