Nongpoh, Naitung 12: Ki nonghikai SSA na Ri-Bhoi hapoh ka lama jong ka All Meghalaya SSA School Teachers Association (AMSSASTA), mynta ka sngi kila pynlong syndon da ka jingïalang ha Nongpoh ban dawa naka sorkar ba kadei ban pynlait noh ïaka tulop joong ki nonghikai kaba la sahkut mynta la kumba 5 bnai naduh u bnai Rymphang 2022.
Ha katei ka jingïalang lawan ban ïadon bynta lang daki nongkitkam jong baroh ki 3 block ha Ri-Bhoi, kiba kynthup naduh u President jong ka AMSSASTA Ri-Bhoi District u Bah S Kharsyiemiong, L Kharbuki President na Bhoirymbong Block, P Khymdeit President na Umsning Block, B Ryntathiang, ka Kong M Lyngdoh bad kiwei kiwei ki dkhot jong ka District.
Haba kren sha ki lad pathai khubor naka liang u Bah S. Kharsyiemiong, President AMSSASTA, Ri-Bhoi District u la pynpaw ka jingsngewkhia kaba jur halor ka jingleh meinah jong ka sorkar ka bym ju pyrkhat ïaka jingeh jong ki nonghikai kiba hap ban mih surok naka por shaka por ban dawa tulop naka sorkar, bad kumba long haduh mynta ki nonghikai SSA kim ioh tulop la kumba 5 bnai kaba la buh jingeh ïakiba bun ki nonghikai ban pyndap ïaka iing ka sem bad ki jingdonkam baroh.
Lyngba katei ka jingïalang naka liang ki nonghikai da kawei ka sur kila dawa ruh naka sorkar ba dei ban pynlait noh mardor ïaka tulop jong ki nonghikai bad lada ka sorkar kam patiaw naka liang ka AMSSASTA Ri-Bhoi District kila rai ruh ban ai ka jingkyrshan bad mynjur ban shimbynta lang haka jingshong kyllaiñ mongor bala pynbeit da ka Central Body haka 15 tarik Naitung ha Secretariat ban pynbor ïaka sorkar ba kadei ban pynlait noh ïaka tulop jong ki nonghikai.
