Sawa ka sur u paidbah ha ka ‘rally’ pyrshah ïa u ba bat bor ïa i khyllung ba dang 1 snem 8 bnai

Mawkyrwat, Naitung, 12: Ka long kaei kaei ka jingjia ba sngewtriem bad kaba pynpar ‘ñiang khriat ïa kiba bun namarba ha kine ki khyndiat sngi uwei u runar u la batbor ïa iwei i khyllung iba dang 1 snem 8 bnai iba dei na kawei ka shnong hapoh jong ka South West Khasi Hills District.
Lah ban kdew ba u runar uba la leh ïa kane ka kam pap ka sang ha ka 7 tarik u Naitung, 2022 ha ka por 12:00 baje eiei shiteng sngi bad une u runar uba dei ruh ha kajuh ka por u Pasan trai jong ine i khunlung.
Shwa ban pynlong ïa ka jingïalang la pynlong ïa ka jingïaïaid paidbah ha kaba la ïashim bynta naduh ki khynnah skul, ki nonghikai, ki sengbhalang bad kumjuh ruh ki nongïalam shnong ha ryngkat ki jingpyrta ba ka aiñ ka dei ban ai ka jingbishar kaba hok bad dei ruh ban set a-long shi jingim ïa u runar.
Ki nongkren ha kane ka sngi ki la pynpaw ka jingsngewlem na ka bynta ka ïing ka sem jong i khyllung iba la shah bat bor ha uwei u runar u bym don shuh ka raiñ ka rem bad leh ruh ïa kane ka kam ha ka por mynsngi mynshai bad ka long kaei kaei kaba bym lah ban pdiang da ka imlang ka sahlang.
Ha kajuh ka por ki la pynrem jur ïa kane ka jingleh jong une u runar u ba u la bat bor ïa i khyllung ba dang 1 snem 8 bnai i bym pat tip ei ei ruh em bad i ba dang luilui. Namarkata, ki la buh ka jingdawa na ki bor jong ka aiñ ba ki dei ba ai ka jingpynsaja kaba tyngeh bad set a-long shi jingim ne phasi ïa kum une u briew khnang ba kiba kum kine ki briew kiba don ïa kum kane ka jingthmu ban leh ïa ki ka sniew kin nym mlien.
Ki nongkren ki la ong ruh ba ka jingmih kum kine ki jingsniew bad kum kine ki jingjia ka dei ruh na ka daw jong ka jingnang kharoi ki jingdih ba pynbuaid kum ka kyiad, u drok bad kiwei kiwei ki jingdih kaba pynlong ïa ki briew ba kin shlur ban leh ïa ki kam sniew namar ynda la buaid kim tip shuh ïa ka raiñ ka rem da kaba leh ki kam jakhlia. “Ka jingleh jong une u runar ka la pynjah burom ym tang ïa ka ïing ka sem jong u, hynrei ïa ka kur ka jait, ka shnong ka thaw, ka imlang ka sahlang baroh kawei”, ong uwei u nongialam ka Seng Samla Shnong.
Ka Kong Biti Jyrwa na ka HNYF Women’s Wing Central Body ka la kyntu ïa ki kmie ki kpa ba ki dei ban long kiba phikir na ka bynta ki khun ki kti ban kiar na kaba ai mon palat, bad ki khun ki kti ruh ki dei ban ri ïa la akor ka burom ha ka riam ka beit, ka ktien ka thylliej bad kumjuh ruh ha ka shongkha shongman. “Ki ‘riew bymman bunsien ki thmu ban leh donbor ïa kiba heh hynrei kim ïoh kumta kim kheiñ shuh shuh ïa ka raiñ ka rem bad ki pynjot pynban ïa ki khyllung khynnah”, ong ka kong Biti.
U Marconi Thongni na ka KSU Ranikor Circle u la pynpaw ba kum ka seng ka phah ïa ka khubor sngewlem ïa ki bahaïing kiba la ngat ïa kum kane ka apot bad hooid hapdeng jong ka jingsngewsih kthang hynrei kum ka seng kan ïadon lem bad ki ha la ka sngi.
Shuh shuh haba kren halor kane ka jingjia u la ong ba kum kane ka jingjia kam pat ju jia ha kane ka dong ka thaiñ hynrei dei ka sien ba nyngkong bad ba ka la pynlong ba haduh ban da ïa mih paidbah ban pynrem halor ka jingshah thombor.
“Ha ki por ba mynshwa mynba ka dang khlaiñ kawei ka seng kieng atiar ha ka jylla Meghalaya ka HNLC ka ju pyndeng tala ha khmat u paidbah ïa ki ‘riew bymman kiba leh ïa kum ïa kine ki jait kam”, ong u samla Marconi bad bynrap, hynrei mynta pat ym ju ïoh sngew shuh ba ki briew kin sheptieng bad ki la shlur ban leh ïa kine ki kam ba poh jait.
U la ong ba lada ka long tang kumne kum ka Seng kan shim hi noh ïa ka bor ban pynkhie im biang ïa kane ka bynta khnang ba ki ‘riew bymman kin duh jait noh syndon namar lada bun tang ki runar kiba pynjot ïa ka longrynïeng jong ki khyllung khynnah ka lawei jong ka ri bad ka jaidbynriew kan sah hi ha ka jingdum.
U la dawa na ka Sorkar bad ïa ki bor jong ka aiñ ba kan shimkhia da kaba pynshitom bad pynsaja ïa kum une u runar da kaba set a-long shi jingim ne dei ruh ban shu sdien phasi kum ïa kine ki briew.
U Myntri ha ka jingkren jong u, u la ong ba une u briew uba la leh ïa ki kam kiba pynsuh ‘niangkhriat ha ka imlang ka sahlang bad u bym don shuh ka mynsien ïatiplem ne ka raiñ ka rem.
“Wat ki mrad ruh ki dang don ka mynsiem ïatip lem hynrei une u briew pat ula leh ki kam poh jait poh rati kaba ijli kaba khampoh wat ïa ka jingim jong ki mrad ruh”, ong u Myntri shnong bad pynpaw ruh ba kane ka jingjia ka la pynsngewsih bad pynoh mynsiem ïa ki kur ki jait ïa ka shnong ka thaw ba u la pynjahburom ha kaba ym shem poi pyrkhat ba kan ju jia ruh ha kane ka dong ka thaiñ.
U la kyntu ïa ki longkmie long kpa bad ki khun samla ba kin peitthuh bad ban peit lem ïa kiei kiei baroh namar na ka daw ka jingkharoi ki jingsniew lyngba ki jingdih kyiad bad u drok bad kiwei de ki jingdih ba sniew ka sa wanrah ïa ka jingbym-shongsuk shong-shngaiñ ha shnong ha thaw.