Yn bishar bniah bha ka ïingbishar HC halor ka kaiphod bthei ka par dewïong bad ïap 33 ngut

Shillong, Rymphang 19 : Ka ïing Bishar High Court jongka jylla kan shong bishar bniah bin pa bin ïa ka kaiphod jongka sorkar halor ka jingjia bthei bom ha par Mynsngat-Thangsko kaba wanrah ka jingiap ïa 33 ngut ki briew shwa ba kan shim kano kano ka rai.
“ Ha ka jingpeit ba lyngkot la pyni ba ka kaiphod ka donkam ban da shong bishar bniah bha da ka ïing bishar shwa ban pynmih ïa kino kino ki rai ne hukum “ ong ka ïing bishar Division Bench hapoh ka jingpeit u Justice H.S Thangkhiew bad Justice W Diengdoh.
Ka ïing bishar ka la buh tarik ruh ban bishar ïa ka PIL ha ka 24 tarik mynta u bnai ha kaba la bthah ruh ïa u SP ka East Jaintia Hills u Pankaj Rasgania bad u SP ba la leit noh u Vikash Kumar ba kin ïa wan mih hakhmat ka ïing bishar ha katei ka sngi ba shong bishar ïa ka PIL.,