Wan ïuhkjat u Sachin Naik, kum u Observer ka AICC ha SWKH ban bishar ïa ki kam Congress

Mawkyrwat, Rymphang 19 : U Sachin Naik, u nongpeit ne Observer jong ka All-India Congress Committee (AICC), u la hiar sha South West & West Khasi Hills District ban bishar bniah ïa ka jingtreikam jong ka seng Congress bad kane ka jingwan jngoh jong u ka long halor ka jingpynkhlaiñ ïa ka party lyngba ka jingthung ïa ki President ba pura ha ki District Congress Committee.
U Sachin Naik haba kren ha ki lad pathai khubor ha Mawranglang, ula pynpaw ba ka rai jong ka AICC ban buh ïa ki Observer ne ki nongpeit ka dei shibynta jong ka rukom pynbeit kaba ïalam sha ka jingthung ïa u District President ba thymmai ha ki District bad ki Jylla bapher baphert hapoh jong ka Ri India. Ula ban jur ba kane ka jingthmu jong ka AICC ka long ban pynthikna ïa ka jinglong kaba beit ki kam, ka jingïamir jingmut, bad ka jingshim rai lang hapoh ka jinglong jong ka party.
Shuh shuh u la pyntip ba ka AICC ka la bthah ïa ki Observer ban leit jngoh ïa baroh ki Block Congress Committee kiba hap hapoh ka jingpeit jong ki. Kumta, da kane ka jingbthah, u Sachin Naik ha ka 18 tarik u Rymphang, 2026 u la hiar ha South West Khasi Hills District, da ka jingthmu ban pyndep ïa ka jingleit jngoh ha ki ar tylli ki Block ki kynthup ïa ka Mawkyrwat bad ka Ranikor, katba ha West Khasi Hills District ha ki lai tylli ki Block ki kynthup ïa ka Nongstoiñ, Mawshynrut, bad Rambrai Block.
Ym tangkata, ula pyntip ruh ba ka Indian National Congress ka la sdang ruh ïa ka Sangathan Srijan Abhiyan – ka jingïakhih ban pynkylla ïa ka seng ha baroh kawei ka ri – hadien ka jingïalang jong ka AICC kaba dang shen ha Ahmedabad. “Kane ka jingthmu ka long shaphang ka jingtei ïa ka rukom kaba kham khlaiñ ïa ka seng Congress, kaba don jingkitkhlieh, bad kaba ïadei bad ki briew kaba sdang naduh ki District Congress Committee”, u la ong.
Ha kine ki jingleit jngoh, u Nongpeit un sa ïakynduh bad ki nongkitkam bad ki nongïalam jong ka party Congress ban lum jingmut, ban bishar ïa ka jingkhlaiñ jong ka party ha ki jaka bapher bapher, bad ban wad jingmut ban pynkhlaiñ ïa ka party ha ki kyrdan distrik bad block. Da kane ka jingïamir jingmut la khmih lynti ba kin don ka bynta kaba kongsan ha ka jingthung ïa ki President jong ki District Congress Committee ki ban sa wan bad ha kaba pynskhem ïa ka jingïatylli bad jingïatreilang jong baroh hapoh ka Party Congress.
Kiba la donlang ha kane ka sngi ki kynthup ïa u bah Kynpham V. Kharlyngdoh u President ka South West Khasi Hills District Congress Committee, u bah Arful Syiemlieh, General Secretary ka South West Khasi Hills District Congress Committee, u bah Philos Thongni, u nongpeit ka Meghalaya Pradesh Congress Committee, ki Mahila lem bad kiwei de.