Shillong, Rymphang 19: U Myntri ka Tnad Public Health Engineering (PHE) u Marcuise N Marak ula pyntip ha ïing Dorbar Thawaiñ ba yn sa tei ïa ki jaka ban eksamin ïa u Shyiap ne ka Sand Quality Testing , u ban pyndonkam haba tei ïa kino kino ki jingtei ha ki jaka um ne Water Projects namar kumba long mynta la aiti sha ka NIT, hynrei ka sorkar ka don ïa ka jingthmu ban buh noh la ka jong ka Lab ha Shillong, Tura bad Jowai.
Kane ka jingai jingpynshai ka la mih hadien ba u MLA na ka TMC u Rupa M Marak ula kren halor ka jingtih syiap na ki wah bad pynpaw ïa ka jingsngewkhia hadien ba ka la don ka jingmad kaba sngewsih na lade shimet.
“Nga sheptieng ba ka lah ban long ka bym shngaiñ. Nga lah duh ïa i mei jong nga ha u snem 2024 haba ka top um ka la khyllem halor jongi” ula ong bad ka kylli la mynta ka don kano kano ka jingteh lakam da ki kyndon.
U Myntri ula pynthikna ba ïa ka Testing la leh wat na ka bynta ka jingshna ïa ki water-tank project kiba rit.
“Ki contractor kiba la ïoh ïa ka kam ki hap ban phah leh ïa ka Sand Testing sha ka NIT. Kila pynïaid shakhmat ïa ki kam katkum ka contract kaba ïaid ryngkat bad ki kyndon jong ka IS” la ong u Marcuise Marak.
Ula pytnhikna ba yn leh da kaba tyngeh lada ki kontraktor ki pynkheiñ ïa ka contract. “Khlem pep, lada ngi ïoh pdiang ïa kano kano ka jingujor, ngi ngin leh da kaba tyngeh”.
Katba u MLA ka VPP u bah Brightstarwell Marbaniang ula wanrah ïa kawei pat ka mat, halor ka jinglait um na ka dam ha Lum Shyllong–Shiliang-Um kaba la tei dang ha u snem ba la dep.
Haba jubab halor kane, u Myntri ula ong, ba ka long kaba kongsan ban ïoh ïa ka Third-Party Certification hashwa ban pyllait ïa kano kano ka jingsiew hapoh jong ka JJM.
“Nga kwah ban kyntu ïa ki dkhot ba lada phi lap ïa kino kino ki jingdkoh, long kiba ïai myllien ban pyntip, khnang ba yn ïoh ban pynlong ïa ka jingtohkit bad ban lah ban leh da kaba tyngeh”.
