Thmu ka Congress ban pynkhlaiñ ha manla ki Block bad District, yn jied President thymmai ha Ri-Bhoi

Nongpoh, Rymphang 18: Ka seng Congress lyngba ka prokram Sangathan Srijan Abhiyan ka la sdang ïa ka sienjam ban pynkhlaiñ bad pynthymmai ïa ka rukom treikam jong ka party naduh tynrai, da kaba thmu ban jied ïa ki nongïalam ba thymmai ha man la ki District bad Block jong ka jylla Meghalaya.
Na ka bynta kane, u John Richard Lobo, observer ba la phah da ka All India Congress Committee (AICC), u la wan sha Ri-Bhoi District ban bishar bad pyrkhat kumno ban pynkhlaiñ ïa ka party ha kane ka district, kaba mynta ka dang don tang u Adhoc President.
Haba kren sha ki lad pathai khubor ha Umsning, ha ryngkat ka jingïadonlang u Bah Rocky Marwein, Adhoc President ka Ri-Bhoi District Congress Committee, bad u Bah Johnathan Syiem, Vice President ka MPCC Youth Congress, u John Richard Lobo u la ong ba ka thong jong ka Abhiyan ka long ban pynim biang ïa ka party da kaba pynthymmai ïa ki nongïalam bad ki buit treikam ha man ki kyrdan.
U la ïathuh ba lai ngut ki observer kin peit ïa ka jingjied nongïalam bad kin lum ïa ka jingsngew bad jingai jingmut na ki nongïalam bad ki paidbah, hynrei ka rai kaba khatduh kan leit sha ka AICC. U la ong ba ki nongïalam ba hakhlieh ka party ki kwah ban ïohi ba ka Congress kan khie im biang bad treikam katkum ka nongrim synshar paidbah bad ka jingangnud jong ki paidbah.
Shuh shuh, u la ong ba ka party kan ieng naka bynta ki rit paid, ki longkmie bad ki kynhun kiba shah iehbeiñ, bad ban pyndep ïa kane ka thong donkam ïa ki nongïalam kiba khlaiñ naduh ka District Level haduh ki shnong ki thaw.
U John Richard Lobo u la pyntip ruh ba un don ha Ri-Bhoi haduh ka 24 tarik Rymphang ban leit kynduh ïa ki Block Committee bapher bapher, ban ïakren markhmat bad ki nongkitkam bad ki paidbah halor ki jingeh bad ki lad ban weng ïa ki.
Na ka liang u Bah Rocky Marwein u la ong ba ka jingphah observer da ka AICC ka long da ka jingthmu ban jied noh ïa u President ba pura jong ka Ri-Bhoi District Congress Committee, namar haduh mynta ka district kam pat don ïa u President ba pura. U la bynrap ba ka observer kan leit sha man la ki Block ban lum jingïarap bad jingai jingmut shwa ban shim ïa ka rai halor ka jingjied President thymmai.