Ka New Shillong kan dei ka Engine jong ka roi ka par bad jingkiew ka jylla ong u CM

Shillong, Rymphang 17 : U Myntri Rangbah ka Jylla u Conrad K Sangma ula ong ba ka sor New Shillong kan long kum ka engine jongka roi ka par bad ka jingkiew jongka jylla. Nalor kata u la ong ruh ba kan long ruh kum ka nongaikam kaba bun eh namar kan pynmih ym duna ïa ka 1.5 lak tylli ki kam bad kan plie lad ïa jan baroh ki longïing ha ka Jylla.
Haba jubab halor jingïatai hapoh ïing Dorbar Thaw Aiñ ha ka sngi Ba-ar, u Conrad ula ong “Ka New Shillong ka long kum ka engine pynroi ka Meghalaya-ba la tei bad pynïeng nongrim ha ki saw tylli ki paia : ka tourism, sports& culture, education & skilling bad technology. Ryngkat lang, kine ki tnad kin khring ïa ki karkhana thymmai, thaw ïa ki lad thymmai, bad pynmih palat 1.5 lak ki kam, ka ban pynlong ïa ka New Shillong kum ka jaka pdeng ha ka jingïohkam ki samla jong ngi”.
U la pyntip ïa ka jingïaid jong ki kam haduh mynta, u Myntri Rangbah ula ong “Ki kam ki la ïaid bha ha ka jingtei ïa ka sor New Shillong”.
Bynta-1: Ka Administrative City, ka ban don ki Ophis treikam ba kongsan kum ka Meghalaya Legislative Assembly, Meghalaya Secretariat, ka IIM Shillong, NIFT, NEIAH bad NEIGRIHMS, ka ban pynlong ia ka knowledge bad Healthcare hub.
Ka project Meghalaya Secretariat ba 1,231 klur tyngka ka la ïaid ka kam ban tei kumba 35%, bad ka Legislative Assembly Building kala jan dep artad, ong u Conrad.
Ka thain kan sa nang kylla ruh kum ka jaka ïathied ïapet lyngba ka Unity Mall bad ka jingtrei ka la ïaid mynta 40% bad ki surok ban don ki dukan kiba la plan bha.
U Conrad ula ïathuh ba haduh 64.9 acre ka jaka la buh ban shna ïa ki jaka pule higher education bad skilling bad ka IT Park kaba lah ban pynmih haduh 1500 tylli ki kam.
Ka plan shna ïing ka kynthup ïa 51.68 are ban tei ïa ki ïingsah, bad 10.9 acre ïa ki iingsah kiba jem dor ki ban don 435.
Bynta 2: Ka Knowledge City ha Mawkhanu, kan don ïa ka IT park kaba heh, ka Skill & Innovation Hub, ka Monolith Tower bad ka Football Stadium ba don 40,000 ki jaka shong.
“Kine ki jingtei kin thaw ïa ka ïoh ka kot ba thymmai bad kin pynmih ia ki kam ki jam” ong u Conrad.
Ka projek ka buh hakhmat eh ïa ka jingpynneh pynsah ïa ka mariang, ki madan shnong, bad ka jingthaw kam thaw jam, ha kaba 85.9 akar la mang na ka bynta ki park bad ka madan ba khlem jingker, u la bynrap.
U Conrad ula ong ba ka Town and Country Planning Scheme ka pynïadon bynta ïa ki Dorbar Shnong bad ki nongshong shnong ha ka jingplan ïa ki kam pynroi. ‘Ka jingtei ïa ka New Shillong kaba la leh ha ryngkat ka jingkitkhlieh ïa ka mariang, kaba kynthup lang ïa baroh ka imlang sahlang, kaba pynkylla ïa ka ïoh ka kot bad ka jingburom ïa ki trai shnong” ula ong haba bynrap ba ka Sorkar ka la kut jingmut ban pynthikna ïa ki jingmyntoi na ka bynta ka Mawryngkneng bad ki shnong ba markhap.
U Myntri Rangbah ula kren ruh halor ki lai tylli ki bynta kiba kongsan jong ka sor New Shillong-ki lad pynïasoh, ka jingsam umbam umdih, bad ka bording”.
Ka lad pynïasoh ka dei u budlum ka New Shillong” ula ong haba kdew sha ka Comprehensive Mobility Plan (CMP) kaba la buh ïa ka lynti treikam ba 30 snem.
Ka CMP ka kynthup ïa ki surok ba kongsan kum ka Ummir-Mawkhanu bala dep pyntrei ha ka jinglut 201 klur tyngka bad ki surok pynïasoh sha ki shnong ki thaw na ka bynta ka jingïaid lynti kaba suk. Ka New Shillong ka ïoh jingmyntoi ruh na ka surok Guwahati-Shillong-Silchar high-speed cooridor bad ka jingpynheh ïa ka kad liengsuiñ, kaba buh ïa ka kum ka jaka pynroi jong ka thaiñ.
Halor ka umbam umdih, u Conrad ula ong ba ka Detailed Project Report (DRPR) ka kdup ïa ka jingdonkam ki 32 tylli ki shnong. “Ka rukom treikam ba thymmai kan ai haduh 56 million liter shisngi ka um sha palat 4 lak ngut ki briew” ula ong haba pyntip ba ka phase-1 kan 591 klur tyngka ka dang ïaid ka jingpyntrei, bad ïa ka um lah tan na wah Umkhen.
ïa ka bording, ka 33 KV Umroh Sub-Station bad ki laiñ kiba la tan sha kiwei kiwei ki jaka, ki la pynduna ïa ka bording. Ka 40 MVA substation ka ban wan ha Mawkhanu bad Umsawli kin sa pynkhlaiñ ïa ka grid.
U Conrad ula ong ba ka Master Plan, ba la pynkhreh da ka NESAC da kaba pyndonkam ïa ka GIS, ka la pyrkhing ban tei jingtei ha ki jaka ba ju shlei um bad ba ju twa khyndew