Nongpoh, Rymphang 17: Ka Meghalaya State Skills Development Society (MSSDS), Ri-Bhoi District, mynta ka sngi ka la pynïaid ïa ka Recruitment Drive ha District Library, Nongpoh, na ka bynta ban ai kabu ïa ki khun samla jong ka dong bad ka thaiñ Ri-Bhoi ba kin ïoh jingïarap ha ka liang ka ïohkam ïohjam, wat shabar jylla bad shabar ri ruh.
Haba ai jingkren sha ki lad pathai khubor, u Bah Saibok Khriam, Skills Development Officer ka MSSDS Ri-Bhoi, u la ong ba ka thong jong kane ka prokram ka long ban wanrah ïa ki lad kiba shai bad ban plie lynti ïa ki samla wad kam, khnang ba kin lah ban pynkhreh ïalade katkum ka sap bad ka jingangnud jong ki.
Ha kane ka Recruitment Drive, ki samla ki la sdang da ka jingpynrung kyrteng, bud sa ka jingïakren bad ki counsellor ban sngewthuh kham bha ïa ka jingthrang bad ka jingïadei jong ki bad ki kam kiba don. Hadien kane, la pynlong ïa ka interview da ki panellist kiba la bishar ïaka jinglah ka jong ki. Katto katne ki samla ki la ïaid lyngba ar bynta ki jingïakren shwa ba kin shah jied ban leit pyntbit ïalade ha ki kam kiba ki sngewtynnad.
U Bah Saibok u la pyntip ruh ba kane ka sienjam kan ym kut tang ha Nongpoh. La pynbeit ban pynlong sa kum kane ka Recruitment Drive ha Umsning Block ha ka 21 tarik Rymphang bad ha Bhoirymbong ha ka 24 tarik Rymphang, khnang ban ai kabu shuh shuh ïa ki samla jong kiwei pat ki bynta ka district.
Na ka liang ka MSSDS, la khot bad wer ïa ki khun samla kiba don jingthrang ban seng ïa ka lawei jong ki ba kin wan shim bynta ha kitei ki sngi ba la buh, khnang ba kin ïoh ïa ka jingïarap bad ka jingïalam lynti sha ka lawei kaba kham bha.
