Nongpoh, Rymphang 15: Ha kaba ïadei bad ka jingpynkhreh ban pynlong ïa ka elekshon ban jied ïaki nongmihkhmat haka jylla Assam ha ka rukom kaba jai jai bad khlem jingthut, ki heh ophisar jong ki district khappud ka Meghalaya bad Assam kila pynlong ka jingïakynduh lang dang shen ban pynthikna ba kane ka elekshonban wan haka jylla Assam kan long kaba ïaid beit ïaid ryntih.
Ha kane ka jingïalang la wan shim bynta da ki heh ophisar naduh u Commissioner of Police, Guwahati City, u IGP Guwahati, ki Deputy Commissioner ka Kamrup (Metro) bad Kamrup (Rural), u Superintendent of Police ka Kamrup (Rural). Na ka liang ka Meghalaya, la donlang u Deputy Commissioner bad u Superintendent of Police ka Ri-Bhoi District, kumjuh ruh u Deputy Commissioner bad u Superintendent of Police ka West Khasi Hills District, ryngkat bad kiwei ki heh ophisar na ki district kiba marjan hapdeng ki ar jylla.
Ha ka jingïalang la ïakren sani halor ka jingdonkam ban pynkhlain ïa ka jingïatreilang hapdeng ki bor synshar bad ki pulit khnang ban tehlakam ïa ka suk ka saiñ ha ki jaka khappud.
La ïakren ruh halor ka jingïasam jingtip, ka jingpeitngor ïa ka jingïaid jingïeng ha ki khappud jylla bad ka jingpynkhreh ïa ki lad jingïada ban lait na kino kino ki jingjia ba sniew ne ki huri hura kiba lah ban pynthud ha ka por elekshon bad naka liang ki bor district kila rai ban ïatreilang khnang ba ki paidbah baroh khamtam haki shnong khappud kin ioh ban shimbynta laitluid ban jied ïaki nongmihkhmat khlem kano kano ka jingshah pynthud.
