Ba kyrni dih drok ki khun die lilam lut ka longkmie ïa ki jingdon jingem tang ban phah sumar

Nongstoiñ Rymphang 15: Ka jingdon jong ki khun ki kti kiba ngop ha ka jingdih drok ka pynsohsat ïa ki kmie ki kpa kiba ha ïng ha sem bad ka pynklumar ïa ka shnong ka thaw bad ka imlang sah lang.
Haba phai ha ka jingdon jong ki khhynnah bad ki samla kiba la ngop ha utei u jingdih ba sniew ka West Khasi hills ka dei kawei na ki district kaba bun bha ki khynnah bad ki samla kiba la kyrni ha utei u jingdih.
Wat la ki bor jong ka aiñ ryngkat ki kynhun pahara shnong ki la ïakhun katba lah ban ym ailad ba utei u jingdih ba sniew un ïoh ban rung hapoh ka district hynrei haduh kine ki sngi ki dang don kiba ïoh lad ban pynrung sop sop ha kano ma kano ka por.
Na ka bynta ban ïarap bad ban pynsgewthuh ïa kito ki nongdih drok ba kin kylla bad iehnoh noh ïa katei ka jingmlien ki nongïalam jong ka Balang Presbyterian New Nongstoiñ ki la buh ka jaka ban ïasyllok bad ban ai jinghikai ïa kito kiba kwah ban kylla kaba mut ha kaba bun ki samla ki la lah ban kylla hynrei ki dang don bun byllai ki bym pat lah ban ieh noh ïa utei u jingdih.
Dang ha kine ki khyndiat sngi ba la dep la ïoh ban ïakynduh ïa kawei ka long kmie kaba la buhrieh noh ïa ka kyrteng jong ka la ïoh ban ïakren bad ka ha kaba ka la ong ba ka don lai ngut ki khun shynrang ha kaba arngut ki dei kiba la ngop ha ka jingdih drok.
Katei ka longkmie ka la ong ruh ba naduh ba ka la ithuh ba ki khun jong ka ki la ngop ha utei u jait jingdih ka la ïasyllok ïa ki miet bad sngi ba kin iehnoh noh ïa katei ka kam kaba sniew hynrei kim kohnguh satia.Ka la ong ruh ba ka la pynlut da ki lakh tyngka ban phah ïa ki sha ki jaka sumar hynrei ynda ki la mih na kitei ki jaka sumar tang hadien katto katne por ki la ngop biang ha utei u jingdih
Katei ka long kmie ka la ong ba ka na ka bynta ban pah sumar ïa kitei ki khun ka la die lilam lut ïa ki jingdon jingem jong ka namar ba ka dei ka riew kynthei bad ym don mano mano ba ïarap lem ïa ka.Ka long kaba sngew sangsot haduh katta katta haba katei ka longkmie ka ïathuh ïa ka jingshem lanot jong ka tang namar ka jing kyrni jong ki khun ha ka jingdih drok.
Haba phai pat ha ka jingdon jong ki jaka sumar ïa kiba kyrni dih drok ha West Khasi hills haduh mynta don tang kawei ka jaka sumar ha ka shnogn Langumshing kaba la pynïaid da ka ïng ka sem jong ka kong Thio Wahlang bad ki la don bun ngut ki ba la leit ban shah sumar ha katei ka jaka.
Haba phai pat na ka liang ki jaka sumar ba la buh da ka sorkar haduh mynta ym pat don satia wat kawei ruh kumta ka la don kam ba ka sorkar kan thaw ki lad ki lynti ban buh ïa ki jaka sumar (Rehabilitation centre) ha West Khasi hills na ka bynta ban sumar ïa kiba kuyrnih hautei u jait jingdih bad ban kham pynkhlaiñ shuh shuh ïa ka tnad pulit Anti Narcotic Task Forece hapoh ka district ban pahara ba utei u jait jingdih un ym ïoh lad ban rung bad ban pynjot ïa ki khynnah bad ki samla.