Kam dei kaba suk ban pyntrei hynrei 90% la pyndep ha WKH: Gabriel Wahlang

Nongstoiñ, Rymphang 12: Ha West Khasi Hills District lyngba ka skhim JJM, la dep ban pynpoi um sha ki 348 tylli ki longïing (Haar Ghar Jal) bapher bapher. Halor kane, na ka liang ka ophis u Executive Engineer Nongstoiñ Division cum Member Secretary DWM, West Khasi Hills District lyngba ka Jal Jeevan Mission ka skhim pynpoi um bam um dih ka sorkar pdeng sha ki nongkyndong, mynta ka sngi ka la ïoh ban pynkut ïa ka jingrakhe ïa ka Jal Arpan Diwas hapoh West Khasi Hills District.
Kumjuh ruh kum ka dak ban rakhe kmen halor kane ka jingjop, la ïoh ban sam ïa ki Syrnod jingpyndep sha ki san tylli ki shnong kiba kynthup ïa ka Mawlangdep, Mawïawa, Diskiang, Umsaw bad Tiehsaw bad yn sa nang sam ter ter sha kiwei ki shnong ruh kumjuh.
Ha kane ka sngi u MLA ka Nongstoiñ u Bah Gabriel Wahlang u la long u kongsan, ha ryngkat ka jingdonlang u MDC ka Nongstoiñ u Dr Juristman Ïawphniaw kum u symbud kongsan, ka Smt Hema Nayak IAS, Deputy Commissioner West Khasi Hills, District, Bah L.Dhar SE PHE Western Circle, Bah T.Karbuddon EE PHE Nongstoiñ Division, kiwei pat ki ophisar ka tnad PHE, ki Rangbah Shnong, bad ki nongshong shnong jong kine ki san tylli ki shnong.
Haba ai jingkren ha kane ka sngi, u Bah Gabriel Wahlang u la pynpaw ka jingsngew kmen ba ka JJM mission ka la long shisha ka jingkyrkhu ïa ka dong ka thaiñ West Khasi Hills District, ha kaba 348 tylli ki shnong ki la ïoh jingmyntoi lyngba kane ka skhim, kat haduh ba mynta ka sngi la ïoh ban sam syrnod bad aiti ban pynïaid hi da ki shnong sha kine ki san tylli ki shnong bad yn sam ter ter sa kiwei pat ki shnong kiba la pyndep ïa kane ka skhim.
“Kam dei kaba suk ban pyntreikam ïa kane ka skhim, hynrei ngi sngewnguh ba ha West Khasi Hills District 90% tam la dep ban pyntreikam ïa kane ka skhim”, ong u Bah Gabriel u ba la ban jur ruh ïa ki Rangbah Shnong bad ki nongshong shnong ba ki dei ban sumar ïa ki tyllong um, ban da thung dieng met ha jaka ba don ki tyllong um, ban sumar dalade ïalade ha kaba ïadei bad ki pipe um, ki kor um jong ka JJM.
U la ong ruh ba ki paidbah nongshong shnong kim dei ban don ka mynsiem ban kheiñ ïa ki kum ki mar ïoh ei, khamtam ba mynta la aiti ha ki ban ïit ban sumar. Kumta ki dei ban don ka jingkitkhlieh khnang ba ka jingkyrduh um kam wan ha ki shnong ki thaw jong ngi.
Kiwei kiwei kiba la ai jingkren ha kane ka sngi ki kynthup ïa u Dr Juristman Ïawphniaw MDC, u ba la ban jur ïa baroh ba ki dei ban niewkor ïa ki tyllong um, ban sumar khuid namar lyngba kane ka skhim JJM ka donkam ïa ka jingïatreilang hapdeng ki shnong bad ka tnad PHE. Lyngba kane ka skhim la lah ban pynïoh ïa ka um kaba khuid kaba lah ban lait na ki jingpang kiba bun jait kum ka Cholera bad kiwei kiwei.
Katba na liang jong ka Smt. Hema Nayak IAS, ka ong ba ka JJM mission ka donkam ïa ka jingïatreilang jong baroh ki tnad sorkar. Baroh ki tnad sorkar ki donkam beit ïa ka um ha ki jaka trei ki jong ki bad ha kajuh ka por ka donkam ruh ïa ka prokram pynsngewthuh ha ki shnong ki thaw.
“Ïa ka um la pyndonkam ha kiba bun ki bynta, la ka dei ha ïing, ki kam rep kam riang bad ki jingdonkam kiba man la ka sngi. Bad man la uwei pa uwei u briew u dei ban pynrung ïa ka mynsiem jingkitkhlieh ban pyndonkam phikir ïa ka um ban lait na ka jingkyrduh um hadien habud”, ka la ong.
Ha kine ki sngi kiba la leit, ka tnad PHE ka leit sha kine ki san tylli ki shnong, ban test ïa ka um, ban pynlong rally kumjuh ruh ban pynsngewthuh sha ki paidbah ïa ka jingkordor jong ka um bad kumno kin sumar bad tyngkai ïa ka.
Kiwei pat ki prokram ha kane ka sngi ki kynthup ïa ka jingpule jingkular (Pledge Reading), jingrwai bad jingshad tynrai, kiba la pynsngew tynnad shuh shuh ïa kane ka prokram.