Nongpoh, Rymphang 11: Ka seng Hynniewtrep National Youth Front (HNYF) Northern Region mynta ka sngi kala leit ban kynduh syndon ïaka Dr. D Blah, Medical Superintendent ka Nongpoh Civil Hospital hadien ka jingud jingnam jong ki paidbah sha ki nongïalam ka seng halor shibun ki jingduna ha katei ka jaka sumar naduh ka Trauma Centre kaba khlem pyndep shuh, ka jingdonkam ruh ban don ka ICU, bad ka kamra ba kyrpang naka bynta ki koidi kiba shah sumar ha katei ka hospital sorkar.
Haba kren sha ki lad pathai khubor hadien ka jingleit kynduh naka liang u Bah Donroy Kshiar Education Secretary ka HNYF Northern Region haka jingdonlang u Bah Ronald Tangsang Disciplinary Secretary, Ajay Rani President 20mer circle, Vincent Sylliang Secretary 20 mer circle, Precious Manar President Umling unit u la ong ba kum ka seng ka dap da ka jingsngewkhia halor ka jingduna kiba bun ha kane ka jaka sumar jong ka sorkar kaba ki paidbah ki khmih lynti ban ioh ka jingshakri kaba paka ha kaba ïadei bad ka koit ka khiah.
U la ong ruh ba haduh mynta ka Trauma Centre kaba la donkam eh ka dang shu sahkut khlem da pyndep shuh bad kumba long mynta la ioh jingtip ba dang dep tang kumba 60% eiei bad dang sah sa kumba 40% ban pyndep ïaka bad kane kala wanrah ka jingeh kaba khraw ïaki paidbah ba leit sumar namar ki shu sumar tang ki jingmynsaw ba malu mala katba kiba kham jur la phah sumar beit shawei.
Ka seng kala pynpaw ruh halor ka jingdonkam ban don noh ka Intensive Care Unit ne ka ICU naka bynta ban pynsuk ïa ki paidbah khamtam kiba duk ba rangli ba kim donkam than ban da leit phah sumar shawei ki jaka lada kane ka jaka sumar kan treikam hok kumba thmu.
Nalor kata ka seng kala kyntuh ruh sha ka sorkar lyngba ka MS ba dei ban buh noh lakajong ka jaka sumar naka bynta ki koidi kiba shah kem namar kumba long mynta ïaki koidi kiba shah sumar la pynthiah lang bad ki paidbah kaba wanrah ruh ka jingsyier namar ka jingdon ruh ki pulit kiba pahara ïaki bad kam long ruh kaba itynnad ban pynthiah lang ïa ki nongpang paidbah bad ki koidi ha kajuh ka kamra bad ka sorkar ka dei ban shna noh laka jong ka kamra.
Khatduh eh ka seng kala kyntuh ruh ïaki 5 ngut ki nongmihkhmat ha Ri Bhoi District ba kidei ban kren ïa kane ka mat sha ka sorkar ban pynbit pynbiang ïa kane ka Civil Hospital ba kam dei ban long tang ka kyrteng hynrei hynrei kan long shisha ka jaka sumar kaba lah ban ai ka jingshakri kaba paka bad kaba biang ïa baroh ki paidbah kiba leit shah sumar.
