Jowai, Rymphang 11: Ka ïing ka sem jong ka kong Mailang Bartow bad u ma Gregorius Dkhar kiba dei ki nongshong shnong jong ka Shnong Barato ki la ïoh ïa ka ïingsah bathymmai ïa kaba la plie mynta ka sngi ka 10 tarik u Rymphang, 2026 da u Fr. John Micheal Marboh uba dei u Parish Priest ka Parish Barato kaba hap hapoh ka West Jaiñtia Hills District.
Ïa kane ka ïing thymmai la noh syniang da u Dr. Willi Maier uwei na ki nonglehbha uba na ka Ri Germany bad la pynbit pynbiang bad pynïaid ïa ka jingtei da ka Jaiñtia Hills Development Society (JHDS) ryngkat bad ka jingïatreilang bad ka Seng Khublei Germany.
Lah ban kdew ba ha u Bnai Ïaiong jong u snem ba ladep, ka er-ïong bajur ryngkat bad u phria ki la pynjulor ïa kiba bun tylli ki ïing ki sem ha ka shnong Barato ha kaba kane ka longïing ka dei ka ba la kham jur ha ka jingshah ktah. Hadien ka jingjurip ba bniah bad ryngkat ka jingmynjur ka Dorbar Shnong Barato ka JHDS ka la shim ïa ka sienjam ban wad ki lad ki lynti ha ka ban ïarap ïa kane ka longïing.
Shuwa ban aiti ïa kane ka ïing, la don ka jingduwai kyrkhu kyrdoh da u Fr. John Michiel MarboP, parish Priest jong ka Parish Barato ha ka jingïadonlang u Fr. Manbha Pakem, Director ka JHDS, u Bah Denis Kurkalang, Coordinator ka JHDS, u Rangbah Shnong jong ka shnong Barato u ma Stelin Lamare, u Secretary ma Lamkordor Dkhar ryngkat bad ki bahaïing hasem jong katei ka longïing.
Ha ka ba kut ka program, Ka kong Mailang Bartow kala ai khublei ïa ki nongïarap, kyrpang eh ïa ka JHDS ki ba la shim ïa kane ke sienjam ban pynïoh ïa ki kane ka ïing ba thymmai.
