Ryngkat ka thong ban pynduna jingbun briew, rakhe ka ophis u BDO ïa ka World Population Day ha Ri-Bhoi

Nongpoh, Naitung 11: Ka ophis u Block Development Officer, Ri-Bhoi District mynta ka sngi kala rakhe ïaka World Population Day halor ka phang “A world of Eight Billions” ha Nongagang Audirium Hall Marngar ryngkat ka thong ban hikai sha ki paidbah ban pynduna ka jingioh khun bad ka jingbun birew ha ka pyrthei.
Ha katei ka sngi la sakhi ruh da ka jingdonlang u Dr. R Nongrum BDO ka Umsling C&RD Block, u Bah A Wanswett nonghikai jong Alpha English Higher Secondary School, Kong A Thabah Counsellor DM&HO Nongpoh kiba long kum ki resource person, ki nonghikai ki khynnah skul bad kiwei kiwei ki riew rangbah.
Naka liang ki khynnah skul ha katei ka sngi kila pynlong ruh ka jingïaid rally ryngkat ki placard ban hikai sha ki paidbah halor kumno ban pynduna bad pynjlan ïaka jingioh khun naka bynta ban ïada naka jingbun briew ha kane ka sla pyrthei.
Haba kren ha katei ka sngi naka liang u Dr. R Nongrum BDO u la ong ba ïa katei ka sngi World Population Day la ju rakhe man la u snem halor ka jingeh kaba ka pyrthei ka mad naka jingbun briew naduh ka iohkam iohjam, ka bam ka dih bad kiwei kiwei ki jingdonkam kaba ktah ruh ïaka ioh ka kot bad ka jingkiew jong ka ri.
Ïa katei ka prokram la rakhe ruh shibynta ban ai jinghikai ïaki paidbah ba kin nang ban pynjlan ïaka jingioh khun bad ban pynduna ruh hakajuh ka por kumba ka jingbun briew kala kiew sted haka pyrthei kaba la jan kot ruh kumba 8 billion, namarkata ki paidbah ki dei ban sngewthuh shai lada ki kwah ba ki khun ki kti kin bit kin biang bad ka ri kan kiew shaphrang.
Naka liang u Bah A Wanswett bad ka kong A Thabah kila ai jinghikai halor ka jingma jong ka shongkha khynnah, ka koit ka khiah bad donkam ban pyrkhat janai ban pynduna ïaka jingioh khun namar ka longiing kaba rit ka dei ka longiing kaba suk ba kmen.