Ka por ka la dei ba ka sorkar kan shimkhia ban pynheh noh ïa ka surok Rwiang – Athiabari

Nongstoiñ, Rymphang 09 : Ka jingdon jong ka surok ka surok na Rwiang sha duh Athiabari kaba jngai kumba sanphew wei kilomitar ka la long ka jingkyrkhu kaba khraw ïa ki paitbah nongshong shnong jong ka West Khasi Hills kata naduh ki thaiñ Nongstoiñ.
Haba phai pat sha ka jinglong jingman jong katei ka surok kam pat dei kaba kylluid hynrei ka dang long kaba khim bha bad ka la idonkam ban pyneh biang khang ba ki kali kiba kit ïa ki nongleit nong wan kin kham suk. Ha shilynter katei ka surok kaba kham i don kam palat ban pynheh shuh shuh ka dei naduh ka shnong Langja sha duh shnong Tynghor kaba dang shu dep ban siang rong ha kine ki khyndiat snem ba la dep haduh Tynghor.
Nalor kata ïa ka jingpynbha bad siang rong na Tynghor shaduh Athiabari pat dang shu pyndep ha u snem ba la dep kata ha u 2023 – 24 ka dei hadien ba ka sorkar pdeng ka la shimti ban pyntrei lyngba ka skhim PMGSY. Wat la ïa katei ka surok la dep ban siangrong hynrei ka dang long pat ka surok kaba rit bad kaba khim bha. U bah Besralding Kharsyiemlieh secetary ka shnong Langja ryngkat u bah Dreston Kharsyiemlieh sordar ba rim jong katei ka shnong haba ïakren bad u nongthohkhubor ki la ong ba ki paitbah jong ki bun phew tylli ki shnong kiba don ha ka thaiñ ki da angnud eh ba ka sorkar kan thaw ki lad ki lynti kumno ban pynheh biang ïa katei ka surok.
U Bah Kharsyiemlieh u la ong ruh ba ka jing kwah jong ki paitbah ka long namar ba kat nang mih ki sngi ki kali kiba ïaid lyngba katei ka surok la nang bun namar ba ki nongshong shnong naduh Athiabari Aradonga , Rangsahpara, Upperlangsah haba ki leit don kam sha Nongstoiñ ki ïaid lyngba katei ka surok namar ka kham jan ban ïa kaba ïad na ka surok Riangdo.
Kitei ki rangbah ki la kdew ruh ba ka jingjngai na Rwiang sha Athiabari ka long tang sanphewwei kilomitar katba Rwiang shaduh Athiabari ka jingjngai ka long haduh hynriewphew ar kilomitar. U la ong ruh ba baroh ki paitbah nongshong shnong ka thaiñ ki dei kiba im ha ka rep ka riang bad ka ïew Hahim bad Boko ha Assam ki dei ki ïew ki hat ba ki paitbah ka thaiñ ki sngew trai bha namar ki dei kiba jan bha.nalor kata ki la ong ruh ba kitei ki artylli ki ïew ki dei ki jaka pdeng jong ka khaïi ka pateng jong ki nongrep na katei ka thaiñ.
Ha kajuh ka por u la ong ba na hadien ba ki paitbah ka thaiñ ki la pynsngew na ka por sha ka por halor ka jingdon kam ban pynheh ïa katei ka surok na ka liang ki rangbah shnong ka thaiñ ba kynthup naduh Athiabari ki la dep ban leit ïakynduh ruh ïa u bah Prestone Tynsong Symbud Myntri Rangbah ka jylla uba bat ruh ïa ka tnad PWD ban pynsngew halor ka jingangnud jong ki paitbah bad na ka liang jong u Symbud Myntri Rangbah u la kular ba un sa shim khia bad u la ong ruh ba ka sorkar kan sa ïaleh katba lah ban thaw ki lad ki lynti na ka bynta ban pynurlong ïa ka jingangnud jong ki paitbah ka thaiñ bad dei halor katei ka nongrim ba mynta ki kwah ban pynkynmaw biang sha ka sorkaar ba kan leh noh kham kloi ïa kaba don kam.