Mairang, Rymphang 09: Kum shi bynta ban pynkhreh bad ban ai ka jinghikai na ka bynta ki nongtrei kam ophis sorkar bad ki paidbah nongshong shnong lada wan ka jingjia khih u jumai bah, na ka liang ka Ophis jong ka Revenue & Disaster Department Meghalaya State Disaster Management Authority, ka Ophis jong ka District Disaster Management Authority Eastern West Khasi Hills District, ha ryngkat ka jingïatreilang bad ka National Disaster Management Authority, ha ka sngi 9 tarik u bnai Rymphang 2026, ki la pynlong ïa ka Multi State Level Mock Exercise on Earthquake Disaster ha Mairang, Eastern West Khasi Hills District.
Ha kane ka Prokram la sakhi ïa ka jingmih ban ïashimbynta naduh ki Ophisar Sorkar, ki tnad ophis treikam sorkar bapher bapher, ki nongshong shnong lem bad ki khynnah skul, ha kaba la pynpaw ba ka la don ka jingtwa ki ïing ki sem, ka jingtwa khyndew, ka jingpluh ding bad kiwei .
Ka jingthmu jong kane ka Mock Exercise ka long ban pyni ïa ki rukom treikam bad ki kamram jong baroh ki dkhot kiba hap ha ka Incident Response System (IRS). Kumjuh ruh ban pynkhreh kaba paka lada jia shisha ba don ka jingkhih jumai ha kano kano ka por.
La sdang ïa kane ka mock drill da ka jingpah ka siren ha ka por 12 shiteng nohphai sngi kum ka dak ka jingkhie u jumai u ba 8.2 magnitude, u ba la wanrah ïa ka jingtwa ki ïing ki sem, ka jingtwa khyndew bad ka jingpluh ïing.
La pynbud pat da ka jingmih ki lad jingïarap da ka sorkar lyngba ki tnad treikam bapher bapher kiba kynthup naduh ka rescue team, fire & emergency, civil defense, police, information and media team, medical team bad kiwei.
Ki jaka ba la pynlong ïa kane ka mock exercise ki kynthup ïa ka Tirot Sing Memorial Civil Hospital, ka Ophis District Agricultural Officer Mairang, ka Mairang Presbyterian Science College, ka Riat Mawiong Khri, ka HP Santa Maria Refill Centre petrol pump bad ka Shnong Sangshong. La buh ruh ïa ka Relief camp bad ka health camp ha madan shnong Sangshong Mairang Eastern West Khasi Hills District.
