Nongstoiñ, Rymphang 08: Ha ka por ba u Narendra Modi um pat long kum u Myntri Rangbahduh ka ri, ïa ka umbam umdih la pyntreikam lyngba ki skhim jong ka sorkar jylla ha kaba ki paidbah ki mad shibun ki jingeh na ka jingbym biang jong ki um kor khamtam eh ha ki jaka ba la long sor.
Haba phai pat ha kine ki sngi la bun ki shnong ha kyndong, ka jingpyntreikam ïa ka skhim Jaal Jivan Mission (JJM) na ka bynta ban pynpoi umbam umdih haman la ki thliew ïing, ka ïaid beit ïaid ryntih bha.
Haba ïakren bad ki riew paidbah ha ki shnong bapher bapher kiba la pyntreikam ïa katei ka skhim, ki la ong ba kim lah khlem da ai ka jingïaroh ïa u Narendra Modi Myntri Rangbah duh ka ri, u ba la pyntreikam ïa katei ka skhim.
Ki la ong ba naduh ba treikam ka JJM, ym ju don ne ïoh sngew shuh ka jingïaknieh um bad ka jingïa kawang borti ha ki platform kumba ka la jia ha ki katto katne ki shnong ha u snem ba la dep.
Ki la ong ruh ba watla katei ka skhim sam umbam umdih ka la pynsuk ruh ïa ki nongshong shnong khamtam ha kito ki shnong kiba duna bha ki umpohliew kiba neh ha ki aïom tlang. Hynrei, ki don ki jyrwit jyrwat ha ki shnong kiba ka sorkar ka la dep pynbit pynbiang ïa ki jingdonkam na ka bynta ban pyntrei ïa katei ka skhim umbam umdih.
Kine ki kynthup naduh ka jingrit palat jong ka mang pisa, ha kaba kiba bun ki Kontraktor kiba ïoh ban pyntrei ki pynsahteng noh, khnang ba ka sorkar ka kyntiew biang ïa ka mang pisa bad kiwei kiwei de, kynthup ruh kiba ka ophis ka tyngkhuh bad ka jingbym sngewthuh ki paidbah nongshong shnong ha ki shnong kyndong.
Nangta ha ka jingïadei bad ka jinglut jingsep bad kiwei ki jnit ki jnat, la ong ba wat lada ka sorkar kan kyntiew ïa ka mang pisa ruh kan ym myntoi, namar katba nang mih ki sngi ki tiar ki tar ban pyndonkam kum ka dewbilat, u nar rod, u mawria, shyiap bad kiwei kiwei ki nang kiew dor.
Ka la don ka jingpynpaw ba lada lah, kan jin da la bha ba naduh ba ki ophis ki ai jingtrei sha ki contractor, ka la dei ban pynbiang lypa naduh ka dor ka mur, khnang ba kita kiba ïoh jingtrei kin sdang noh bad pyndep kham kloi wat ïa ka por ba la buh ruh khnang ba ki paidbah ruh kin suk bad ki jingmyntoi kin long kham kloi.
