Sngewkhia ïa ka jingthungkam kiba la leh na lyndet jingkhang, ka pisa u paidbah ka leit kum ka tulop

Shillong, K’Lyngkot 5: Ka Hynniewtrep Youths’ Council (HYC) ka pynrem jur ïa ka jingthung beaiñ bad ka bym shai ïa ki Officers on Special Duty (OSD) sha u Myntri Rangbah ka Jylla Meghalaya khlem kano kano ka jingpynbna paidbah ne advertisement, lane ka jingpynpaw ïa ki kyndon ba dei ban long kiba biang.
Ka HYC ka pynpaw ka jingsngewkhia kaba jur ba kum kine ki jingthung kam ki long kiba la leh na lyndet jong ka jingkhang, katba ka pisa paidbah kaba heh bha ka leit sha ka tulop, ki allowance, ki kali, bad kiwei kiwei ki jingmyntoi-khlem ka jingshai sha ki paidbah ka Jylla.
Kum kine ki jingthungkam khlem shai bha ka long ka jingniewbein ïa ki samla khlem kam khlem jam jong ka Jylla bad ka wan ha ka por ba da ki hajar ngut ki samla kiba la nang la stad kiba khlem kam khlem jam,ki kam sorkar ki sah thylli da ki snem bad ki eksamin thungkam ki sahkut ne shah pynsangeh.
Kine ki jingthung ka pynmih ïa ka jingkylli ïa u paidbah kiba dei hok:Kiei kine ki briew shimet, kiei ki jingtbit jong ki ne ka kyrdan pule, bad ki shakri shisha ia ki jingmyntoi jongno?
Ka Sorkar MDA ne u Myntri Rangbah ka jylla kim lah ban kheiñ ïa ka pisa jong u paidbah kum ka jingpynlut shimet jong ki. Ka HYC ka pyrshah jur ïa ka jingpynlut kaba heh na ka pla tyngka jong ka Jylla halor ki OSD kiba ki bynta, ki jingkitkhlieh, bad ka jingdonkam jong ki kim pat shai bha.Ka pisa paidbah ka mut na ka bynta ka jinghikai, ka koit ka khiah, ki jingtei, ka jingpynmih kam ym na ka bynta ban thaw ïa ki jaka synshar ba ïadei bad ki jingsuk ha ka sain pyrthei.
Ka HYC ka dawa na ka Sorkar Meghalaya ban pynpaw mardor ïa ki jingtip ba bniah jong baroh ki jingthung OSD ba la leh da u Myntri Rangbah ka Jylla,
Ka HYC ka khot ia ki seng bhalang, ki samla bym don kam don jam, ki samla pule, bad ki nongshong shnong kiba sngewthuh jong ka jylla Meghalaya ba kin pynsawa ia ka sur jong ki pyrshah ia kane ka jingpyndonkam bakla ïa ka pisa paidbah bad ka jingpynjot ïa ka jingsynshar kaba khuid hapoh ka jingsynshar kaba mynta.Ka jingsngap jar mynta ka sngi kan pynlong ain ia ka bamsap lashai.
Ka HYC ka pynpaw biang ba kam pyrshah ïa ka jingsynshar, hynrei ka pyrshah jur ïa ka jingsynshar bym don jingkitkhlieh.”Ki kyrdan ba la thaw da ka pisa paidbah ki dei ban shakri ïa ka jingmyntoi jong ki paidbah-ym ïa ka jingsuk jong ka sain pyrthei.”
Lada ka Sorkar ka dang ïai bteng ban khein eiei ïa ka jingsngewkhia ki paidbah, ka HYC kan hap ban pynjur ïa ka jingïakhih jong ka synshar paidbah na ka bynta ka jingmyntoi bad ka jingshai bad ïa ka hok ki samla, kane ka long katkum ka kyrwoh khubor ba la pyllait da u President ka HYC u Bah Roykupar Synrem.