Ban shngaiñ ka lawei ka Ri-Lum Jaiñtia, kyntu ka JNC ban pyntreikam ïa ar tylli ki mat jingdawa

Jowai, Rymphang 05: Ka Jaiñtia National Council (JNC) mynta ka sngi palei hapoh ka jingïalam u President Rangbah ka seng u Sambormi Lyngdoh ha ryngkat General Secretary u Wanshwa Suting lem bad ki dkhot jong ka, kila leit tur kynsan sha phyllaw ka ophis treikam ka JHADC ban pynurlong noh ïaki jingdawa khynra trading licence ïaki bar jylla ba die beaiñ bad ban pyntreikam noh ïa ka ktieñ Pnar hapoh ka ïing borbar thaw aiñ ka District Council.
Naka liang ki dkhot jong ka JNC naduh ka por 11 baje mynstep kila pynlong syndon da ka jingshong kyllaiñ myngngor ha ryngkat ki Placard bad ki jingpyrta pynrem ïa ka jingtlod ka rukom treikam jong ka JHADC.
U President ka seng haka jingkren sha ki lad pathai khubor ula ong kane ka jingïakhih ba jai jai ka long kum ka dak ka jingsngewsih hadien ba ka seng kala dep ban phah jingthoh sha u EM ba dei peit ïaka tnad khaïi pateng bad kumjuh sha u CEM ka Council halor ka jingïoh lad ki bar jylla ban seng ïa ka kamai kajih khamtam shapoh ka District East Jaiñtia Hills.
Ula ong kane ka jingïoh lad ki bar jylla ban seng ïa ki dukan ka lah ban ktah ïa ka lawei ka Ri-Lum Jaiñtia namar ki khun samla mynta ki don hapdeng ka jingkyrduh kam kyrduh jam khamtam ban ïoh ïaka kam sorkar. Kumta ka seng kala dep ban ujor ïa kane sha ka JHADC ban leh ïa kaba donkam bad ban kynra ïa ki bar jylla hynrei haduh kine ki sngi ka Council kam shem la leh ei ei satia.
‘Kane ka jingïakhih ka long kum ka jingkyrsiew thiah ïa ka JHADC kaba la buh jingma ïaka Ri-Lum Jaiñtia naka jingwan rung kyrthep jong ki bar jylla khamtam shapoh ka East Jaiñtia Hills District’ ong utei u President.
Sa kawei ka seng kala dawa ban ithuh noh ïaka ‘ktien Pnar’ ha kaba ka JHADC kala dep pass ïaka Resolution ha u snem 2021 ban ithuh ïa kitei ki dak thoh bad la dep pynmih ruh haka Meghalaya Gazette, hynrei haduh mynta ym pat pyntreikam ïa kane ka Resolution, kumta kila dawa ïa ka Council ban pynlong ïaka Special Session ban pyntreikam ïa ka ktien Pnar ha baroh ki ophis treikam ka JHADC.
Ula kren shai ‘hashwa ba ka seng kan sdang ïa ka jingkhynra ïa ki bar jylla ka pan shwa ïa ka jingïatreilang bad ka jingïatylli na ki shnong ki thaw jong ki Dorbar Shnong bad ki Dorbar Elaka kiba long ka jingkhang ïaka jingïoh lad ki bar jylla.
Da kaba u ong u Khlawait ka Ri-Lum Jaiñtia u Kiang Nangbha hashwa ba un sdang ïa ka jingïaleh pyrshah ïa ki dohlieh ula ïoh shwa ïa ka hukum Blai jong ka jingïatylli lyngba ki lai tylli ki tnad dieng. Kumta utei u President u khot ïa ki Dorbar Shnong, ki Dorbar Elaka, ki seng saiñ hima sima, ki MDC jong ka liang synshar bad liang pyrshah ban don ka jingïatylli lang, na ka bynta ban pynim sha shisien ïaka Ri-Jaiñtia bad ban shngaiñ ka pateng jong ka lawei.
Katba ki dang bteng ïaka jingïakhih na ka liang ki dkhot ka JNC kila ïoh lad ban ïakren bad u Deputy CEM ma Lasky Rymbai, hadien kane u CEM ma Thombor Shiwat ula wan mih ban ïakren bad ki dkhot ka seng ban weng noh ïa ka jingïakhih bad la kyntu ïa ka seng ban phah biang ïaka (Memorandum) kum ka jingpynkynmaw ïa kitei ki jingeh jong ka Ri-Lum Jaiñtia.
Na ka liang u President ula buh ka jingkyntu ïa ka District Council ba kan khot ïa ki sha ka miej jingïalang ha kano kano ka por bad ban ïakren pynbeit ïa kitei ki jingdawa ba donkam, hadien kane ka JNC kala weng noh ïa ka jingïakhih.