Jowai, Rymphang 05: Ka ïingbishar ba donburom jong u Sessions Judge, Jowai, u N.A. Khan, kala rai pynrem syndon ïa u Stam Surong, ha kaba ïadei bad ka Case No. 37 jong u snem 2015 da kaba set phatok shi jingim ïa u halor ka kam runar thang im ïa ka tnga jong u.
Ïa kane ka mukotduma la ujor FIR da u ma Barwill Singh Sari ha Ummulong Beat House da kaba kdew haka 08.09.2006 haka por kumba 5 baje mynstep u ma Stam Surong khun jong u Lo Shadap na ka shnong Mukhla Nongrim, ula thang im ïa ka lok jong u ka Before Sari da kaba pyndonkam ïa ka umphniang sharak ha ïing sah jong ki.
Shuwa ba kan khlad noh na ka jingmynsaw katei ka longkmie kala ïoh ban ïathuh bniah halor katei ka jingjia sha kiba ha ïing ha sem jong ka bad ïa kane ka mukotduma la register kes ha Jowai Police Station No. 104(9)06 U/S 302 IPC bad ïa ka jingtohkit la leh da SI A. Rymbai.
Hadien ka jingbishar bniah ïa kane ka mukotduma, ka ïing bishar ba don burom kala lap ba utei u runar ula leh ïa katei ka kam bad la pynshitom ïa u katkum ka kyndon 302 jong ka Indian Penal Code.
Ïa u Stam Surong la shah rai pynrem da kaba set phatok shi jingim ha ryngkat ka jingshah daiñ kuna kaba T.5,000/- (San Hajar) tyngka.
