Dei ban don ka thong ryngkat ka jingtrei shitom ban poi sha ka jingjop: Commander Shangpliang

Mawkyrwat, Rymphang 05: Ka Seng Samla jong ka Balang Katholik Nativity Church, Mawkyrwat, ka la pynlong ia ka prokram jingiakynduh lang ne ka ‘Get Together’ kaba kyrpang na ka bynta ki khynnah rit kiba don ha ka dkhot jong ka Oratory ha kaba ïa kane ka jingialang ka la long ha St. Vianney Auditorium, South West Khasi Hills District, Mawkyrwat.
Ïa kane ka prokram la wan ban pynshongkun da u Bah Commander Shangpliang kum u kongsan, ha ryngkat ka jingïadon lang u Babu Sylvester, uba long u nongialam bad u nongpeit jong ki khynnah rit. Nalor kita, la sakhi ruh da ka jingdon jong ki Rangbah Balang, u Secretary Balang, u President jong ka Seng Samla, lem bad ki longkmie-longkpa jong ka Balang.
Haba ai jingkren ha kane ka sngi, u Bah Commander Shangpliang u la kyntu ïa ki khynnah bad ki samla ban im ka jingim kaba don ka thong (goal).Ym tang kata, u la buh ruh ïa ki katto katne ki kyntien sneng kiba u la kyntu ïa baroh da kaba ong ba ki khynnah ki dei ban shim khia ïa ka jingpule bad ban don ïa ka thong kaba bit, namar lada don ka thong, ka jingtrei shitom ban poi sha ka jingjop ka wan hi.
U la mynsiem ïa ki samla ban don ka jingmut jingpyrkhat kaba bha bad kaba dei, ym kaba sniew, namar ka jingmut kaba bha ka long ka tynrai ban leh ia kiei kiei kiba ngi thmu. U la ban ruh ba ka long kaba donkam ïa uwei pa uwei ban long kiba sngewhun ha ka jingim haba ki leh ne trei ïa kano kano ka kam.