Nongstoiñ, Rymphang 04: Ka Ophis jong ka District Sports Officer West Khasi Hills District, ha ka sngi balang ka la ïoh ban pynlong ïa ka lympung ïalehkai Kho-Kho bad Kabaddi 2025-26 hapoh ka Rural Sports Programme 2025-26 bad thong jong kane ka prokram ka long ban kyntiew ïa ki kam ïalehkai hapoh ka District.
Ïa kane ka lympung la pynlong ha madan ïalehkai NDSA Nongpyndeng, ha kaba ki la don haduh 83 ngut ki nongïashimbynta kiba la ïashim bynta, da ka jingthmu ban kyntiew ïa ka jingïalehkai bad ka jingkilan met hapdeng ki samla kynthei bad shynrang ka West Khasi Hills District.
U Bah E.Lyngdoh A.C. BDO Nongstoiñ Block, u la long kum u Kongsan, ha kaba u la sam ruh ïa ki khusnam sha ki nongjop, ha ryngkat ka jingdonlang ka District Sports Officer Nongstoiñ bad kiwei ki riew rangbah kiba la shah khot sngewbha.
Ka Nonglang Pungsier Sports and Cultural Club ka la jop ïa ka Kabaddi kyrdan Kynthei, katba ka JNV Nongstoiñ ka la ïoh ban rah ïa ka kyrdan ba ar. Ha ka jingïalehkai Kabaddi jong ki Shynrang, ka Siejlieh Sports and Cultural Club ka la rah ïa ka nam lahduh, ha kaba ka JNV ka la wan ba ar.
Ha ka jingïalehkai Kho-Kho jong ki Kynthei ka JNV ka la rah ïa ka nam lahduh bad ka Nonglang ka la wan ha ka kyrdan ba ar bad ha ka Kho-Kho ki Shynrang ka Siejlieh Sports and Cultural Club ka la rah ïa ka nam jop, katba ka JNV ka la wan ha ka kyrdan kaba ar.
