SHILLONG, Rymphang 02: Ka kynhun ki nongïalehkai Kickboxing ryngkat bad ki nongpynïaid (Team Official) kaba don 26 ngut jong ka Meghalaya State Kickboxing Association (MSKA) ki la mih ban leit sha New Delhi hynne ka step sngi Nyngkong, 02 tarik Rymphang, 2026, ban ïashim bynta ha ka 5th India Open International Kickboxing Tournament ka ban long ha nongbah Delhi.
Kane ka lympung kan sdang naduh ka 04 haduh 08 tarik u Rymphang 2026.
Kane ka kynhun ka kynthup ïa ki nongïalehkai International kum ka Daniella I W Mylliemngap na Lumparing Lumdorbar Shillong, ka Medariphyla Lyngdoh Nongbri na Smit Lemthaw ha ryngkat u Babit Kharsahnoh bad ka Belldona Pakyntein na Mawkyrwat.
Ki don 9 ngut ki nongïalehkai Kickboxing Kynthei bad 14 ngut ki Shynrang ba la ïalam da ki Coach ba la ïoh Licence ba kynthup ïa u Khrawjutang M Kharsyntiew na Mairang bad u Fourwell Khongmalai na Wahkdait Dawki ryngkat u Official Lorenzo Pearson Warjri, uba dei ruh u Working President ka Meghalaya State Kickboxing Association bad u dkhot Executive Member jong ka WAKO India Kickboxing Federation.
Ka Kickboxing ka dei ka jingïalehkai kaba la ithuh da ka International Olympics Committee bad na ka tnad ïalehkai jong ka Sorkar India.
Haduh mynta naduh u snem 2017, ki nongïalehkai Kickboxing jong ka MSKA ki la ïoh ban khur haduh 257 tylli ki takma na ka bynta ka Meghalaya, kiba kynthup ïa 92 tylli ki takma ksiar, 69 tylli ki rupa bad 96 tylli ki rnong. Napdeng kine, 54 tylli ki takma kidei kiba la ïoh khur ha ki rynsan ïakop bar ri (International) bad 9 tylli ki takma ba la khur da ka NEHU ha ka All India University Games naduh u snem 2019.
Ha u bnai ban wan, ha ka 26 tarik Rymphang haduh 01 tarik u Lber 2026, ki thei ïalehkai Kickboxing jong ka Meghalaya kin sa mihkhmat ïa ka jylla ha ka rynsan ïakhun jong ka East Zone Khelo India Asmita Women League ka ban sa long ha Siliguri. Ha kane ka lympung la khmihlynti ba baroh 9 tylli ki jylla kiba hap hapoh ka East Zone kin ïashim bynta.
Ha ka jingïalang kitbok kitrwiang shuwa ba ka kynhun kan leit ban aireng ha katei ka lympung, u Shaiborlang Lyngdoh Mawphlang – President jong ka Meghalaya State Paralympics Association bad General Secretary Blind Football Association u la ai mynsiem ïa ki nongïalehkai ban leh bha bad pynneh pynsah ïa ka jingkheiñ ha ka jingïoh khur takma ha ka Kickboxing, kaba long ka kam kaba sngew sarong ïa ka Jylla bad ka Thaiñ.
