Ba khlong maw khlem akor ka Bhagya Traders Company pyrshah ki shnong ha syndah ka Wah Umngi

Mawkyrwat, Rymphang 01: Ki katto katne ki shnong kiba don syndah bad ka wah Umngi ha ryngkat bad ki paidbah nong shong shnong ka shnong Balat bad ka shnong Mawshaliah kiba hapoh ka Ranikor Civil Sub Division kiba dei ki shnong bad kiba ju shah ktah man ka por ha ka jingshah rong ki ïing ki sem ha ka 31 tarik u Kyllalyngkot, 2026 ki la mih paidbah ban pyrshah jur halor ka jingkhlong shyiap khlong maw khlem akor ka Bhagya Traders Company na Guwahati kaba pyntrei ïa ka jingker kynroh shilynter ïa ka wah Umngi na ka bynta ban ïada ïa ki shnong na ka jingshah rong bad shah bam noh ka khyndew ha ka um.
Kum ka dak jong ka jingpyrshah, ki paidbah jong kine ki ar tylli ki shnong Balat bad ka shnong Mawshaliah ki la mih paidbah ryntih naduh ki samla shynrang bad kynthei, ki longkpa ki longkmie bad ki nongpynïaid shnong ban leit jurip ïa ki jaka kaba kane ka Bhagya Traders Company ka la khlong maw pathar shaphang mihngi jong ka wah Umngi. Kine ki jaka ba kane ka kompani ka La klong ka dei ba na ka liang ki bor distrik naduh mynshwa ki la khang pyrshah ban tih maw tih shyiap.
Ym tangkata, la ong ruh ba ha ka jingleit jurip la lap ba kane ka Bhagya Traders Company, tang na ka daw ka jingmyntoi ïa lade bad ban pynsuk ïa ka rukom treikam, ka la khlong pathar ïa u shyiap, ki maw khlem da sngap ïa ka jingbthah.
Namarkata, na ka liang ki bor shnong ki la khang pyrshah ïa kane ka Bhagya Traders Company ban khlong maw na kine ki jaka bad da kaba ki ai por ruh 10 sngi ïa ka Bhagya Traders Company ba ka dei ban pyndap maw biang ïa kine ki jaka ba ka la dep ban khlong. Ha kajuh ka por ki la kyrpad ruh ïa u Nongmihkhmat jong ka Ranikor Constituency bad ki bor sorkar ba kin wan ban tuklar lem halor kane ka kam khnang ba kan ym don kano kano ka jingktah hadien habud ha kaba ïa dei bad ka khyndew ka shyiap.