Nongpoh, Rymphang 01: Hadien bun snem ba ki paidbah ki mad ka jingeh kaba khraw bad syrtok haka leit ka wan namar ka jingjot rathai u surok na Nongpoh sha Umden, ka long pat ka jingkmen kaba khraw hadien ka jingshah shitom bala bun snem, utei u surok u la urlong kumba ki paidbah ki angnud bad la dep ban siang rong ha shilynter kaba pynsuk shi katdei ïaki paidbah.
Kum ban shu pynpaw hangne ba haki snem bala leit nalor ka jingjot rathai utei u surok u don ruh hapdeng ka jingpum pum bad buh jingeh ïaki paidbah ba leit ba wan bad wat hapdeng ka jingïakhun ban ïoh ïa u surok ba paka naduh u nongmihkhmat bad ki nongïalam shnong, kawei ka longkmie naka thaiñ Umden kala mih ruh ban leit shah thngan khlem pud shaduh nongbah Shillong ban dawa naka sorkar ba dei ban siang rong noh ïa utei u surok khlem sangeh tad haduh ba kan da ioh jubab naka sorkar.
Lah ruh ban kdew hangne ba ki paidbah kiba leit ba wan man ka sngi ki ud ki nam namar ka jingjynjar haka leit wan khamtam kiba pang ba shitom bad kiba beh sha ki skul bad kolej, bad ka bam por haduh 1 kynta tam ban poi sha Nongpoh haka jingjngai kumba 20 km, hynrei bun naki paidbah ki la pynpaw ka jingsngewkmen ba utei u surok u la iong ngaiñ bad bam por sa tang kumba 30 minit eiei.
Wat hapdeng bun ki jingkynthoh bad ka jingkwah iohnam halor utei u surok, ki paidbah mynta kila suk bad aram haka leit ka wan ba wat ka bynta ka khatduh ban siang rong pyndep ruh la dep ha shilynter utei u surok kaba long shisha ka jingkmen ïaki paidbah, khamtam shuwa ban pdiang ïaka jingïaseng Synod.
