Shillong, Rymphang 01: U Samla Pynskhem Mawrie uba dei u samla na ka shnong Laitkor uba dei ruh u nongseng kam lajong u la plie lad plie lynti ïa ki phew ngut ki khun samla ba kin ieng ha la ki jong ki kjat na ka bynta ban kyrshan ia la ka iing ka sem jong ki tang hadien ba kila dep ban shah hikai.
U Samla Pynskhem u dei uba la pyndep ia ka jingpule ha ka liang jong ka Audio Tech ne ka Audio engineering ha u snem 2021 bad hadien ba u la dep ïa ka jingpule u la trei shi snem bad kane ka jaka ba u leit ban shah hikai pyntbit bad hadien u la wan ban seng noh la ka jong ka studio bad ka institute.
Ha ka jingïaid jong ka por u samla Pynskhem ha u snem u la seng ïa ka Lee Mawrie Studio and Institute, ha Laitkor tang ha i kamra barit ha u snem 2024 ia kaba u la register ruh bad ka sorkar jylla.
Hynrei dei ha ka 31 tarik u kyllalyngkot la plie paidbah ïa kane ka studio da u Bah Lambor Malniang uba dei u MLA bad MDC barim jong ka Nongkrem Constituency ha ka jingsakhi lang u Bah L Arun Mawrie uba dei u President ka kur Mawrie bad ki nongkit kam shnong nalor kiba ha ïing ha sem.
Haba kren lyngkot shaphang kane ka Lee Mawrie Studio and Institute u samla Pynskhem u la ïathuh ha kane ka institute ngi hikai ïa ka photograpgy, videography, sound engineering bad ka audio engineering bad ka DJ.
U la ïathuh ba ka klass kala sdang naduh u 2024 bad ki don palat 20 ngut ki samla kiba la pass bad kine ki khynnah mynta kila long briew man briew bad kila leit ban tem kylleng kylleng, namar ba ha kane ka institute shisien ba ki khynnah ki wan ban pule ngi ïaleh ban thep ba kin ïoh kam.
Shuh shuh u samla u la ïathuh ba u la leh ruh ïa ki stage lighting, ki light ki sound, DJ bad kaba sngewkem eh kadei ba ngi don ka jingthmu ban dang pynheh ia kane ka institute khnang ban gin ioh ai training khambun ki samla.
Na ka liang u Bah Lambor Malniang haba kren u la ong, Ban dang kham pynkmen shuh shuh ïa ngi ka long ba ngi ïohi ba ki khun samla kiba wan ha kane ka institute kin sa lah ban ïeng ha la ki jong ki kjat bad kata kadei kaba donkam eh.
“Kaba ngi mad ha kane ka juk kaba mynta kadei ka jingeh jong ka jingbym ioh kam ioh jam bad kane kadei ka jingïaleh ba shyrkhei bha bad ngim ong ba ka jingeh tang hapoh ka jylla hynrei kadei ha ka ri hi baroh kawei namar ka jingbun briew kala nang kiew katba dang mih ki sngi” ong u Bah Lambor.
Kum shi bynta ban dang pynheh ban pynïar ia kane ka studio bad institute u Bah Lambor u la ong, ngan pynshim khia namar ba ka mission ba u Myntri Rangbah jong ngi u ïaid mynta haba u leit ha kino kino ki institute kiba khot sngewbha ïa u, u ju ai eiei bad ngan pynïakren ba la kumno kumno ban pynheh ïa kane ka studio bad ïa ka institute jong phi bad nga da kwah ban ïalam ïa phi ban ai kawei ka jingthoh sha u bad nga ban pynïoh shuh shuh ka jingbei pisa ha kaba iadei bad kane ka studio bad institute.
