Ki don ki jaitbynriew kiba la sdang ban kiew ha ka longbriew, hynrei ka hiar pat ka jingieid ïa u Blei: Archbishop Victor

Jowai, Rymphang 01: Ïa ka Good Shepherd Parish la plie ha ka snem 2001 bad ha kane ka snem 2026 ka la dap pura 25 snem bad ïa kane ka jingrakhe Jubilee Rupa (Silver Jubilee) la pynkut mynta ka sngi ka shi tarik u Rymphang ha Madan ïingskul Higher Secondary School Good Shepherd Parish Ladrymbai, East Jaiñtia Hills District, ha kaba la wan ban sakhilang da ki hajar ngut ki paidriewngeit napoh ka Parish (Good Shepherd Parish) bad nabar kaba la long la kum kawei na ki jingïaseng proseshon Iukharist kaba heh hapoh ka Diocese Jowai.
Ka jingpdiang burom ïa u Kongsan, ïa ki Kynrem ki Lyndan, ïa ki ‘riewkhmat bad ïa kiba la shah khot sngewbha ka la sdang naduh ka por 9:30 baje mynstep bad ïa u Mot jingthoh pynsah kynmaw (Memorial Stone) la plie bad kyrkhu da ka Umkhuid Umkyntang da u Most. Rev. Victor Lyngdoh DD Archbishop ka Archdiocese Shillong.
Ha ka por 10 baje mynstep la pynlong ïa ka jingkñia Mass Iukharist ha kaba u Archbishop Victor u long u Nongkñia Rangbah ha ryngkat ka jingïasynran lang ki Lyngdohsohblei kiba la wan sakhilang ïa kane ka jingrakhe Silver Jubilee jong ka Parish Good Shepherd Ladrymbai.
U Archbishop Victor Lyngdoh haba kren ha kane ka sngi u pynpaw ïa ka jingkmen haba u la ïoh ïa kane ka lad ban wan ban ïa sakhilang ïa kane ka jingrakhe Silver Jubilee jong ka Parish. U Archbishop u ong ka jingïaid lynti jong ka Parish ha kine ki 25 snem ka la ïa kynduh shibun ki jingeh bad ha ka juh ka por ka Parish bad ki paidriewngeit jong ka, ki la ïoh shibun ki jingkyrkhu bad ki jingkyrshan ban pynïaid ïa kane ka Parish ba kan ïaid shaphrang da ka jingïatreilang, ka jingïatylli bad da ka jingïalong kawei bad u kyntu ïa ki paidriewngeit da kaba ong “To nangïaid shaphrang ha ka jingïaieid, ka jingïatylli bad ka jingïalong kawei ba kan nangkhraw shuh shuh ïa ka jingrakhe Jubilee kaba sanphew snem (Golden Jubilee) ha ki por ban sa wan”.
Ha ka sneng ka kraw ïa ki paid ‘riewngeit u ong ki don ki jaitbynriew haba ki la sdang ban kiew ha ka longbriew manbriew, hynrei pat ka hiar ka jingshaniah bad ka jingieid ïa U Blei, hyrei na ka bynta jong ngi pat u ong ngim dei ban long kumta. Haba ngi la kiew ha ka longbriew manbriew to ngin long ki briew kiba tipbriew tipblei bad kiba sngewrit. Ban long ki Nongbud jong U Jisu kam dei tang kito kiba don kiba em, kiba nang kiba stad, u jied ïa kiba rit kiba ria kumba u jied ïa ki Apostol bad peit ïa ki Apostol kim dei ki briew kiba nang kiba stad, ki dei ki Nongbylla bad ki Nongtong dohkha. Haba phai sha ki paid ‘riewngeit jong ka Parish Good Shepherd Ladrymbai u ong “Phi la ïaid lynti ha kine ki 25 snem bad to nangïaid shaphrang bad long ka nuksa babha ïa kiwei.
U Archbishop Victor Lyngdoh u pynkut ïa ka jingkren jong u da ki lai tylli ki WWW bad lai tylli ki SSS kiba thew Word of God, Work in peace bad Witnesing ïa ka Khubor babha nangta ïa ki lai tylli ki S, ka thew Serving God (Shari ïa u Blei), Surrender in God (pyndem ha u Blei) bad Serving the people (shakri ïa ki para briew) bad ka jinglong Khrisrtan kam dei ban aiti ha U Blei tang shiteng hynrei pura cent perscent. Nangta u ong “To long ki Khristan kiba miat kiba bha, ki Nongpynïasuk bad ki Nongpynphriang ïa ka Khubor babha bad hadien 25 snem ha kaba phin sa rakhe ïa ka Golden Jubilee phin nangkiew ha ki liang baroh ban ïa kaba phi long mynta”.
Ha kane ka sngi la wan sakhi ïa kane ka jinglehkmen Silver Jubilee da ka jingiadonlang u ma Kyrmen Shylla MLA ka thaiñ, ka kong Mazel Ampareen Lyngdoh MLA, kong Santa Mary Shylla MLA, ma Hambertus Nongtdu MDC bad kiwei de ki kynrem ki lyndan.