Tang da ka jingïapher kol kut noh ka lynti ïaid jong ka Meghalaya

Shillong, Rymphang 01: Ka jingkyrmen jong ka Meghalaya ban ïoh rung sha ka Quarterfinal ha ka lympung National Football Championship na ka bynta ka Santosh Trophy 2025-26 ka la poi sha kaba kut hadien ba ka la pyndep ha ka kyrdan ba san ha ka Group B.
Ha ka sngi Saitjaiñ ka Meghalaya ka la pyndep ïa ka jingïakhun group stage da kaba ïakhaid mar 2-2 kol bad ka Railways ha Silapathar, Assam. Kane ka la pynlong ïa ka jylla ba kan hap ban ap ïa ka jingmih na ka jingïakhun hapdeng ka Services bad ka Kerala, kaba la long hynne ka step sngi U Blei.
Hynrei kiei kiei kim shym la ïaid kumba ka Meghalaya ka khmihlynti, ha kaba ka Services ka la pynliem noh ïa ka Kerela, kaba la shah pynduna sha ka 10-ngut, da tang 1 kol ban khur ïa ka jingjop ba nyngkong bad ha kajuh ka por ban buh jaka ïalade ha ka Quarter-final na ka Group B.
Da kane ka jingjop Services ka la pynkut ïa ka jingïalehkai group stage da kaba kamai hynriew poiñ na ki san tylli ki jingïalehkai, da kaba jop shisien, ïakhaid lai sien bad shah rem shisien. Watla ka ïaryngkat point bad ka Meghalaya hynrei ka la kiew sha ka kyrdan ba saw ha ka Group B namar ka don ïa ka jingïapher kol kaba kham heh. Ka Kerala kaba la pynthikna lypa ba kan ïoh ïa ka kyrdan ba ha khlieh duh ha ka Group bad ka jaka ha ka Quarter final, ka la pynkut noh ïa ka group stage da kaba jop lai sien, ïakhaid bad rem shisien.
Tang saw tylli ki kynhun ba ha khlieh duh na kawei pa kawei ka Group kin ïohrung sha ka knockout.
Lah ban kdew ba ka jingïalehkai ba khatduh jong ka Meghalaya pyrshah ïa ka Railways ka la long ka jingbam kaba pynhun ïa ki nongkyrshan phutbol, ha kaba baroh ar kynhun ki la ïoh ban lamkhmat markylliang ïa ka jingïalehkai.
Ka Meghalaya ka la long kaba sniewbok hadien ba la kum thep hi ïa ka kol (own goal) ha ka minit kaba 65, kaba la pynïakhaid da u Apborlang Kurbah (66′) shuwa ba u Mebankhraw Wahlang (73′) un pynkhih ïa ka kol lamkhmat na ka bynta ka kynhun. Hynrei ka Railways ka la ïohlad ban pynïakhaid lyngba u Johnson Joseph Mathews (75′) bad ki la kyrshan tyngeh haduh kaba kut na ka bynta ka shi point, kaba la biang pura ïa ki ban ïohrung sha ka Quarterfinal, ryngkat bad ka Punjab bad ka Kerala kiba ladep pynthikna lypa.
Da kane ka kynhun ïalehkai jong ka jylla Meghalaya ka la pyndep ïa ka group stage da kaba jop shi sien (pyrshah ïa ka Odisha), ïakhaid lai sien (Services, Punjab bad Railsways) bad shah rem shi sien (Kerala).
Ka Quarter-final kan sdang ha kane ka sngi Ba-ar, 03 tarik Rymphang, 2026, ha kaba ka Bengal kan ïakhun pyrshah ïa ka Services, ka Tamil Nadu pyrshah ïa ka Punjab, ka Assam kan aireng ïa ka Kerala, bad ka Rajasthan kan ïakhun pyrshah ïa ka Railways.
Ka Semi-final kan long ha ka 05 tarik Rymphang, bad ka phainal la buh ha ka 08 tarik Rymphang. Baroh ki jingïalehkai yn pyni live lyngba ka FIFA Plus.