Jowai, Rymphang 01: Ka kynhun ïalehkai jong ka Khimusniang SC kala long syndon ka lahduh haka lympung 17th U Kiang Nangbah Memorail Trophy jong ka kyrdan ‘Super Division Football Tournament– 2025 bala pynïaid da ka West Jaiñtia District Sports Association, (WJDSA) haka jingïakhun phainal kaba la long mynta ka sngi saitjaiñ ha Kiang Nangbah Stadium Dongmihsngi, Jowai.
Kane ka nam lahduh jong ka Khimusniang SC kala wan hadien ba kala lah ban pynliem ïa ka Ladthadlaboh SC da ka jingïashut Tie Breaker da 4-2 kol, hadien ka jingïakhaid jong ki naduh ka jingïakhun jong ka kylla step, haka kylla miet bad haduh ka Extra Time (0-0).
Ha kane ka Tournament ïa ka nam Man of the Match la ïoh rah da u Reform Pale na ka Khimusniang SC, Best Goal Keeper da u Ialamlang Biam na ka Ladthadlaboh SC, Top Scorer da u Primrose Lamat na ka Demthring SC, Katba ïaka nam Player of the Tournament la ïoh da u Mediphrangki Pohleng na ka Khimusniang SC.
Na ka liang u ma Wailadmiki Shylla uba dei u myntri ka kam ïalehkai Sports bad ka tnad ka koit ka khiah jong ka sorkar jylla ula long kum u kongsan, haka jingdonlang u ma B. Phyrngap Assistant General Manager ka Jowai Co-orperative Urban Bank, Jowai, u DSO ma K. Passah, U bah Finely Pariat General Secretary ka Meghalaya State Olympic Association (MSOA), u Hony. General Secretary ka WJDSA ma Lammat-oo Laloo, ki nongkitkam ka WJDSA, ki nongshah khot sngewbha nalor ki paidbah kiba wan sakhi ïa kane ka sngi.
Na ka liang ka kynhun Khimusniang SC kaba long ka lahduh jong kane ka lympung kala ïoh rong ïa ka song pisa kaba 1 lak tyngka ha ryngkat ka trophy, katba ka kynhun ba wan ba ar ka Ladthadlaboh SC kala ïoh 50 hajar tyngka lem bad ka trophy. Ïa kine ki khusnam la ïarap pisa da u ma Wailadmiki Shylla MLA ka 2-Jowai Constituency.
Shi bynta na ka jingrakhe ïa ka jingdap 50 snem jong ka jingshakri na ka liang ka Jowai Co-orperative Urban Bank, Jowai kala synñiang 50 hajar tyngka sha ka West Jaiñtia District Sports Association, (WJDSA).
