Yn leit jurip u Dy. CM ïa baroh ki projek ba pyntrei ha nongbah Shillong ha ka taïew ban wan

Shillong, Kyllalyngkot 31: U Symbud Myntri Rangbah ka tnat Urban Affairs u Ma Sniawbhalang Dhar u la pynbna ïa ka jingthmu ban leit jurip ïa baroh ki projek bapher bapher kiba la pyntreikam ha kylleng ka nongbah Shillong ha ka taiew ban wan.
“Ha ka taiew ban wan ngan leit jurip ïa ki projek ba la pyntreikam ha kylleng ka nongbah Shillong” ong u Ma Sniawbhalang.
Halor ki projek ban pynitynnad ïa ka sor Shillong, u Ma Sniawbhalang u la pynpaw ba ka Sorkar ka don ïa ka por kaba biang ban pyndep ïa ki Project kynthup ban tei ïa ki project kam pynroi bapher bapher. “Ngi don sa ar snem ka por ban pyndep” u la ong.
Haba kylli ïa ka jinglut na ka bynta ki projek, u Ma Sniawbhalang u la ïathuh baka jinglut ka kot palat 30 klur tyngka.
U Symbud Myntri Rangbah u la ban jur ba ki project kam pynroi ki kynthup ïa ki lynti ïaid kjat bad ki kam pynitynnad iaka sor Shillong, ki jaka pynïeng kali bad kiwei kiwei.
“Mynta ki kam pynroi ki kynthup ban tei ïa ki lynti ïaid kjat bad ki kam pynitynnad ïa ka sor Shillong bad nalor kata, ka jingpynkhuid bad pynitynnad ïa ka Wahumkhrahruh ka la sdang” u la bynrap.