Sahteng ka jingthied jaka theh niut bathymmai namar dang ïaid ka jingïakren

Shillong, Kyllalyngkot 30 : U Symbud Myntri Rangbah u Ma Sniawbhalang Dhar ula pynpaw ba ka jingthied ïa ka jaka na ka bynta ban pynlong jaka theh niut ba thymmai ha Shillong ka dang sahteng namar ka jingïakren ïa pynbeit ka dang ïaid halor ka dor ka mur bad ki trai jaka.
Haba ïakren bad ki nongthoh khubor, ula pyntip ba ka Sorkar ka la dep ithuh ïa ka jaka ha ka shnong Nonghali bad mynta ka dang ïakren bad ki trai jaka ban pynbeit ia ka dor ka mur.
“Mynta kaba sah ka dei tang ka jingïakren pynbeit” ong u Ma Sniawbhalang haba bynrap ba ka jingpynlong ïa ka public hearing ha Nonghali kala ïaid beit ïaid ryntih.
Lah ban kdew hangne, hashuwa kane, ka jingpyrshah ka la mih halor kane ka project namar ba ka lah ban ktah ïa ka wah Umkhren, ka tyllong um kaba kongsan ïa ka thaiñ. Ka Sorkar kala kular ba kane ka jaka theh niut kan dei kaba shna kat kum ka juk stad saian ban tehlakam ïa ka jingpynjot pynjulor ïa ka mariang.