SHILLONG, Kyllalyngkot 31: Ka Langsning ka la khur ïa ka jingjop da 6 wiket ha ka jingïalehkai pyrshah ïa ka Lumpyngngad ha ka lympung ïalehkai Shillong Cricket League Super Division 2026 ba la pynïaid da ka Shillong Cricket Association hynne ka sngi Saitjaiñ.
Haba phai sha ka jingïalehkai, ka Langsning ka la jop ïa ka jingkynting pisa (toss) bad aiti ïa ka Lumpyngngad ba kan tied nyngkong, da kaba pynkhyllem noh ïa baroh 10 ngut ki nongtied na ka bynta 209 ron haki 40.4 ober.
Kiba la kham pawkhmat ha ka tied na ka bynta ka Lumpyngngad ki long u Rahul Shah (62 ron naki 45 bol) bad u Samer shah (34 ron naki 45 bol), hynrei ka jingïalehkai kaba kyrpang ka la wan na ki nongkawang bol jong ka Langsning, ha kaba u Bamanbha Shangpliang u la khur haduh 5 wiket marwei naki 5 ober bad ailad tang 32 ron, katba u Ronnie Nongrum u la khur 2 wiket naki 6.4 ober bad ailad 29 ron.
Ynda la dei sa ka pali ban beh ïa ka thong ka Langsning CC ka la khyllem tang 4 wiket ban kamai 210 ron haki 36.3 ober, ban pynskhem ïa ka jingjop da 6 wiket. La ïalam ha ka tied da u Nishanta Chakraborty, uba la noh synñiang 67 ron naki 71 bol, bad u Riboklang Hynniewta, uba la kamai 35 ron naki 38 bol.
Ha kaba kut jong ka jingïalehkai, u Bamanbha Shangpliang u la ïoh ban khur ïa ka khusnam Player of the Match, hadien ba u la ïarap 17 ron ha ka tied bad pynhap 5 wiket ha ka boling na ka bynta ka Langsning.
