Plie u Myntri ïa ka Children and Adolescents Library and Digital Infrastructure ha Nongtalang

Jowai, K’ lyngkot 30: Ïa ka Children and Adolescents Library and Digital Infrastructure kaba don hajan ka ïing skul Nongtalang Govt Higher Secondary School, Nongtalang, la wan ban plie ïa ka mynta ka sngi Thohdieng da u Bah Lahkmen Rymbui uba dei u MLA bad Myntri ka sorkar jylla ba bat ïa ka tnad pule puthi (Education) kum u kongsan, ha ka jingïadonlang u ma Damuthimi Lyngdoh, Block Development Officer (BDO) jong ka Amlarem C&RD Block kum u symbud kongsan, ha ryngkat u Bah Min Lyngdoh, Rangbah Shnong, u Bah Kat Kassar, Secretary jong ka shnong Nongtalang, ki Self-Help Group (SHG) bad kiwei kiwei ki riew rangbah.
Kan long ka sngi ka ban sah jingkynmaw ïa ka shnong Nongtalang bad khamtam eh ïa ki khynnah pule jong ka shnong Nongtalang hi baroh kawei ba kin ïoh ban pyndonkam katkum ka jingdawa ka por. Ïa kane ka ïing la shna lyngba ka Scheme shispah sngi (Mahatma Gandhi National Rural Employment Guarantee Scheme) MGNREGS da ka jingïatreilang ka Amlarem Block bad VEC Nongtalang.
U Bah Lahkmen Rymbui haba ai jingkren kum u kongsan u la ai ka jingïaroh ïa ki nongtrei ka Amlarem C&RD Block bad kumjuh ïa ka VEC jong ka shnong Nongtalang kiba la pyntrei hok ïa ka pisa paidbah kumba la mang. Ula kyntu khamtam ïa ki khynnah skul ba kin pyndonkam hok ïa kane ka Library, khnang ban ïoh kham bun ki jingmyntoi nalor ki kot pule ha skul.