Ba pynsahteng ban tei ïa ka Block ophis ha Rambrai ka buh ïa ki paidbah ha ka jingeh: FKJGP

Shillong, K’ Lyngkot 30: Naduh ba u Conrad Kongal Sangma Myntri Rangbah ka jylla u la wan ban plie ïa ka Rambrai C&RD Block ha ka 9 tarik Naiwieng 2022 ki paidbah ka thaiñ ki la dap da ka jingsngewkmen namar ki da kyrmen skhem ba ïa baroh ki kam sorkar kiba dei ban pyntrei lyngba ka Block ophis kim don kam shuh ban pynlut por ban leit haduh Nongstoiñ namarba ka Block ophis ka la don ha Rambrai. Phewse la palat arsnem tam haduh mynta u Block Development Officer ba pura um pat don hynrei dang hap ban peit da ki ophisar MCS na Nongstoiñ kumta ka la buh jingeh haduh katta katta ïa ki paidbah ka thaiñ.
Kumta na ka liang ki nongïalam ka FKJGP Rambrai circle hadien ba ki paidbah ki la ud ki la nam na ka por sha ka por ki la pan jingshai lyngba ka Right To Information Act 2005 na u Block Development Officer ka Nongstoiñ uba dei ruh ha kajuh ka por kum u Public Information Officer bad lyngba ka jingwad jingtip ki la ïoh pdiang ïa ka jubab kaba biang kaba la pynishai ba katei ka Block kam pat don ïa u BDO ba pura u ban peit ïa katei ka Block.
Nalor kata katkum ki jingtip ba ka seng ka la ïoh pdiang lyngba ki kot ki sla ki pyni ba ka sorkar ka la dep thung kumba khatar ngut ki nong trei ki ban peit ïa ki kam pynroi jong ka sorkar kiba dei ban pyntrei lyngba ka Block Office kum ka jingpyntrei ïa ka skhim shispah sngi (MNREGA) bad ka skhim PMAY G. Kitei ki khatar ngut ki nongtrei kiba ka sorkar ka la thung na ka bynta ban peit ïa ki hynriew tylli ki G.S.circle ka Kyrshai, Mawdoh, Mawlieh, Mawthir, Mawdet bad Rambrai ki don hynriew ngut ki Data operator bad hynriew ngut ki Technical Asisstant .
Halor katei ka jingud jingnam jong ki paidbah la arsien arwat ki nongïalam ka seng ki la leit ban jurip ïa katei ka Block ophis hynrei ki la lap ba ym don nongtrei wat tang uwei ruh bad wat ka sign board jong ka Block ruh kam don satia lait tang u maw kyrteng ba la buh ha ka por ba la wan ban plie ïa katei ka ophis.
U Bah Jiedstarland Lyngkhoi President ka FKJGP Rambrai circle haba ïakren bad u nongthohkhubor u la ong ba ka jingpynsahteng jong ka sorkar ban tei da ka ophis ba pura jong ka Block u la ong ba ka jingbym don u BDO ba pura bad ka jingbym shimkhia jong ki nongtrei kiba ka sorkar ka la dep thung ka la pynjynjar shibun ïa ki paidbah. Nalor kata utei u nongïalam ka seng u la ong ruh ba ki la ong ba ki paidbah ki la pynsngew ruh sha ka seng ba ki don ki nongtrei kiba wan tang shisien shitaïew kata tang ha ka sngi ïew Rambrai kumta haba ki paidbah ki donkam kyrkieh ha ki sngi ki bym dei sngi ïew ki hap ban leit shaduh Nongstoiñ.
Ha kajuh ka por u la kyntu ïa ka sorkar ba ka dei ban pyntreikam pura noh kloi ïa katei ka Block namar ka jingdon jong ki nongtrei ha Block ophis ka pynjan ïa ka jingïadei jong ki paidbah bad ka sorkar ym tang ha ki kam pynroi bad lad ai jingïarap hynrei kab kongsan eh ka dei ha ka shongsuk shongsaiñ, ka bha ka miat, ka imlang sahlang bad kiwei kiwei ki bynta kum ka jingïaleh pyrshah ïa ki kam sniew kiba bun jait.
Haba pyrshang ban twad jingmut na ki paidbah nongshong shnong katei ka thaiñ pat ki la ong ba katkum ka jingtip jong ki, ki la don artylli ki jaka kiba ki bor sorkar ki la phah ïa ki briew jong ka ban leit sorjamin na ka bynta ban tei ïa ka Block ophis hynrei haduh mynta kim pat ïoh jingshai satia ha kano ka jaka ka sorkar kan tei ïa ka Block ophis.