Nongpoh, K’Lyngkot 30: Ha kawei ka jingjia kaba pynpar ñiangkhriat ïa kiba bun, khlem don shuh ka jingïatip lem, 3 ngut ki hynmen shynrang kynthup uwei ba dang rit ka rta, kila leh ïa ka kam pap kam sang da kaba leh beijot ïa la ki jong ki para kynthei ba dang rit ka rta ha kawei ka shnong ha Ri-Bhoi District.
Katkum ka jingtip ba la ïoh lum la ong ba kitei ki 3 ngut ki hynmen kila leh ïa kane ka kam pap la kham slem hynrei ka la paw pyrthei dang ha kine ki khyndiat sngi hadien ba ki nongïalam shnong hadien ka jingïoh jingtip ki la ujor syndon da ka ejahar sha ki pulit ka Ri-Bhoi pyrshah ïa kitei ki 3 ngut ki bym kheiñ shuh ïa ka pap ka sang bad ka raiñ ka rem.
La ong ruh ba kitei ki hynmen shynrang ki dei kiba don ha ka rta kaba 23, 19 bad uwei pat u ba dang 16 snem katba kitei ki para kynthei ki dei kiba don ha ka rta kaba 13, 10 bad iwei pat ba dang 9 snem ka rta.
Lyngba ka ejahar ba la ujor da ka shnong la ong ruh ba ka kmie jong kitei ki shipara ka la tip ïa katei ka jingjia, hynrei kam shym la ujor eiei hynrei ka ïaleh ban buhrieh ïa katei ka kam pap kam sang ba la leh da kitei ki khun shynrang jong ka.
Na ka liang ka shnong ka la kyntu ruh ïa ki bor pulit ban shimkhia ïa kane ka jingjia bad ban pynngat mukotduma mardor ïa kitei ki hynmen shynrang kiba nud ban leh ïa katei ka kam pap kam sang bad tang hadien ka jingujor na ka liang ki pulit kila ïoh ban kem noh ïa kitei ki hynmen shynrang bad ka jingtohkit halor kane ka jingjia ka dang ïaid shakhmat.
