Kwah u MDC ka Second -War Central ban khot ka sorkar da ka jingïalang paidbah hashwa ban ker sainar shiah

Jowai, K’lyngkot 29: U MDC ka 2-War Central u ma Jamshaphrang Pohtam ula ong ‘Nga ieng skhem haka nongrim jong ki paidbah kiba dei ki trai jaka bad ki nongrep kiba im ja na ka kam rep kam riang ha ki jaka khappud bad ka Ri Bangladesh.
Ula ong ka jingleh jong ka sorkar bad u Dolloi ka Elaka Satpator khlem da kynjoh ktien shwa ïa ki paidbah trai jaka ban sdang ïa ka jingpyntrei surok na ka bynta ban shna ïa ka jingker sainar shiah ha khappud na Muktapur-Jaliakhola-Pasadwar kaba kynthup ïa u Border Pillar No 1283/7s haduh u Border Pillar No 1301/4s kala buh jingma pynban ïa ki jaka rep kiba don shabar jong ka jingker sainar.
“Kum ki nongshong shnong ka Ri India, ngi im haka ri shynshad paidbah bad ka sur jong uba bun ba lang ka long kaba hakhmat eh haka rukom treikam jong ka sorkar, da kaba shim ïa ka rai lyngba ka jingïalang pynsngewthuh paidbah” ong utei u MDC haba kren sha ki lad pathai khubor ha Jaliakhola.
Shuh shuh ula ong kaei kaba jia pat mynta ka sorkar kala pheil haka rukom treikam bad kam shem la burom satia ïa ki paidbah nongshong shnong. Ula kynthoh halor ka jingleh jong u Dolloi ka Elaka u bym shem la burom shuh ïa ka hok ka kynti jong ki trai jaka kaba la wanrah ka jingmih klumar mynta hapoh kine ki phra shnong.
Halor kane u kyntu ïa ka sorkar ba kan khot ïa baroh da ka jingïalang paidbah (public hearing) ban weng noh shi syndon ïa kane ka jingeh. Ula kyntu ruh ïa u Dolloi ban un mih shakhmat ban lung ïa ki paidbah bad lada um lah ban ïaid ryngkat ryngkat bad ki paidbha ka lah ban buh pynban ha ki dieng pynkiang ha kaba kim lah shuh ban burom ïa u kum u Dalloi.
Kum u MDC ula kren shai un ïeng halor ka nongrim jong ki paidbah, da kaba ong ‘ki bri kwai bad ki bri soh ki dei ki jingkyrkhu bala ai da U Blei bad ngim dei ban pyrshang lane knieh jubor ïa kane ka jingai u Blei’, namar ‘lada phi pom pathar ïa ki dieng kwai ka long kumba pom ïa ka khlieh briew’, la pynkut utei u MDC.