Nongpoh, K’Lyngkot 29: Ki pulit ka Ri-Bhoi mynta ka sngi kila kem ïa uwei u rangbah bala tip kyrteng kum u Teibor Mawlong, ha kaba ïadei bad ka mukotduma ha Mawngap Police Station Case No. 32(12)22 u/s 323/325 IPC.
Naka liang ki pulit hadien ka jingtip kaba thikna kila pynlong ka jingkhynra dang step haka khlaw Kseh Kynjoi ha Ri-Bhoi District, bad ioh kem suk ïa u Bah Teibor Mawlong, wat hadien ba u la pyrshang ban phet ban shim kabu ïaka jaka ba long khlaw.
Hadien ka jingioh kem ki pulit kila talasi haka jingdonlang ki nongsakhi bad ioh ban kurup kawei ka pistol revolver kaba la shna ha ka ri ryngkat bad kawei ka mobile phone.
Ïa u tei u rangbah la rah ruh sha iing bishar ban pynlong ka jingtohkit bad ban leh katkum ki kyndon aiñ.
