Shillong, Iaiong 3 : Ka Meghalaya ka la kynjoh 94% tam ka jingdon ki nongshong shnong ba nang thoh bad pule bad mynta ka la buhthong ïa kiba dang sah ban lah kynjoh beit 100%.
“Ngi donkam sa 38,000 ban kynjoh ïa ka 95% namar shisien ba ngi la tam ïa ka 95%, ka mut ba la kheiñ kum ka Jylla ba don pura ïa ki nongshong shnong ba la nang ban thoh bad pule” ong u Myntri ka tnad Pule Puthi Bah Lahkmen Rymbui hadien ba pynïaid ïa ka jingialang bishar bniah ïa ki kam ka tnad ha ka sngi Palei.
U ong ba ka Sorkar kan sa sdang naduh ka 24 tarik Iaiong ban ai jinghikai ha ka pule bad kheiñ jingkheiñ sha ki nong shongshnong kiba dang sah.
“Naduh 24 tarik Iaiong, ki Tnad ba buh da ka Sorkar kin sa pyrshang ban buddien ïa kane khnang ba ngin lah ban kynjoh 100% ka jingdon ki nongshong shnong ba nang pule bad thoh” ong u Bah Rymbui haba pynpaw ïa ka jingsngewskhem ïa ka jinglah ka Jylla ban kynjoh ïa kane ka thong.
