Shillong, Nov 29 : Ki pulit ka Meghalaya ki la dep ban ithuh ïa ki 9 ngut ki briew kiba dei ki nongdie drok kiba la shah kem man la ka por bad kine ki lah ban ngat ha ka jingpynsajia da ka jingshah set phatok ba 3 snem khlem bah jamin.
ïa katei la ïathuh da u Myntri sorkar uba khmih ïa ka tnad Social Welfare Bah Paul Lyngdoh ha ka kynhun jong ka seng Hynniewtrep Youth Council (HYC), kiba la leit ban ïakynduh ïa u mynta ka sngi Balang, ban kyrpad ban pynkhlaiñ ïa ki jingtreikam ban leh da kaba tyngeh ïa ki nongdie drok.
Ka HYC ka la kyntu ïa ka sorkar jylla ban pyntreikam pura noh ïa ka Prevention of Illicit Traffic in Narcotic Drugs and Psychotropic Substances (PIT-NDPS) Act khnang ban pynjur bad pynkhlaiñ shuh shuh ïa ka jingkhynra ïa ki nongdie drok be-aiñ da kaba kem bad pynngat ïa kiba donkti/ nongdie kiba la shah kem la bunsien, hapoh kikyndon kiba tyngeh jong ka PIT-NDPS Act.
Ha kane ka jingïalang, u Myntri ula pyntip ba ki Pulit ki la ithuh ïa 9 ngut ki nongkhaïi droks ba la kem bunsien bad ïa ki kyrteng jong kine, la phah sha ka Advisory Board ba kan bishar shuwa ban pynngat ïa ki hapoh ka PIT-NDPS Act, kaba pynngat jingpynsajia ba 3 snem khlem bah jamin.
U President ka HYC ula banjur ba ym dei tang kitei ki 9 ngut kiba la pynkheiñ aiñ hynrei ki dang bun ngut kiba dei ban shah pynngat hapoh jong ka PIT-NDPS Act.
Ula pynpaw ba katba ka sorkar ka dang thaw ïa ka Advisory Board kumba la pynkup bor ha ka PIT-NDPS Act ha u Naitung 2023, kam long kaba shai kdar la ka Board ka la ai kano kano ka jingbthah ha kaba ïadei bad ka jingdei ban kem ïa kino kino katkum katei ka aiñ haduh kine ki sngi kiba mynta.
Nalor kane, ka HYC kala kyntu ïaka sorkar jylla ba ka dei ban thaw ïa ka Fast-Track ne Special Court ka ban khmih thik tang ïa ki jingjia kiba ïadei bad ki case hapoh jong ka NDPS Act.
