Shillong, ïaïong, 01: Ka Meghalaya Asha Workers Unions Union (MAWU) ha ka sngi Saitjaiñ ka la dawa ïa ka Sorkar Meghalaya Democratic Alliance (MDA-II) ban kyntiew ïa ka jingsiew tulop T.9 hajar shi bnai khnang ba kan ïarap ïa ki ban pyndap pynbiang ïa ka ing ka sem katkum ka jingïaid jong ka juk.
Ka President jong ka Union ka Kong Mira June Myrsing ha ka jingïakren bad ki lad pathai khubor hadien ba la wai ka jingïalang jong ki Asha kaba la long ha nongbah Shillong ka la ong, “lada ka Sorkar kam leh eiei ïa kane ka jingdawa, ka Union kam banse ban lum ïa ki Asha ban mih sha surok ban dawa ïa la ka hok lane ban sangeh treikam shisyndon.”
Ka Kong Mira June kaba la shah jied biang kum ka President ba thymmai ha kane ka sngi ka la pynpaw ba kumba ka la ïalam ha ki snem ba ladep kan nang ïai trei hi kumba ju trei haba ki paradkhot ki dang ibit bad ailad biang ïa kaba kan shakri kum ka nongïalam jong ka Union
Ka la ong ruh ba na ka liang jong ka kan buh ha khmat eh ïa ka kam. Kumba long mynta ki Asha ki ïoh ka jingsiew kaba long tang T. 2000 hajar shi bnai bad ka shongdor tang T. 66 tyngka ha ka shisngi.
Ka la ong ba kane ka jingsiew ba ki Asha ki ïoh kam lah satia ban pynbiang ïa ki Asha. “Ka donkam ba ka Sorkar kan pynkiew shuh ,” la bynrap ka Kong Mira June.
Ka la ong ruh ba ka la don ka jingïakren na ka liang ki nongïalam barim bad ki Myntri jong ka Sorkar kaba rim ha kaba ki la pynpaw ba kin dang bishar shwa ïa ka jingdawa jong ka Union bad hadien kata yn sa lah ban pynkiew bad katno yn pynkiew ïa ka jingsiew bainong.
“Kane ka jingïakren kam shym poi shaei shaei haduh mynta,” ong ka Kong Mira June.
Ka la ong ba kumba ka la shah pynkhamti kum ka nongïalam ha kane ka kynti ruh kan dang dang ïai pynkynmaw biang ïa kane ka mat sha ki tyndong shkor jong ka Sorkar Jylla.
Shuh shuh ka la ong ba lada ka Sorkar kan dang ïai sngap shi sngap kumne ïa ka jingdawa jong ka Union nalor ba ka kam ka long kaba khia katba ka jingïoh pat ka long tang shi dana, na ka liang ka Union kim banse ban dang ïai bteng ïa ka jingdawa ban pynkiew ïa ka jingsiew bainong.
Ha kane ka jingïalang la pynlong ruh ïa ka jingjied ïa ki nongïalam jong ka Union tang na ka bynta ki lai tylli ki post ha kaba ïa ka kam President la pynkhamti biang ha ka Kong Mira June Myrsing, General Secretary Kong Badahunshisha Dkhar bad Treasurer Kong Fionaliza Tingbung.
Da ki phew spah ngut ki Asha kiba don hapoh ka shatri jong ka Meghalaya Asha Workers Union (MAWU) na kylleng ki Unit jong ka rilum Khasi-Jaiñtia bad na rilum Garo ki la poi ban ïashim bynta ha kane ka jingïalang.
