Kyntait ki samla ba pas MTET ba tyrwa da ka Temporary Recruitment

Shillong, ïaïong, 01: Ki samla kiba la pas ïa ka eksamin Meghalaya Teachers Elegibility Test (MTET) ha ka sngi Saitjaiñ ki la dawa ïa ka Sorkar Meghalaya Democratic Alliance (MDA-II) ba kan thungkam noh mardor hadien ba ki la pas ïa kane ka eksamin mynta la jan ar snem kynthih.
Bun na ki samla kiba la pyndep ïa ka eksamin MTET naduh u snem 2021 ki la shu shong khlem kam mynta la ar snem hadien ba ka Sorkar kam pat ai satia ïa ka shithi thungkam.
Ha ka jingïakren bad u nongthoh khubor, u nongïalam jong ka MTET Passed Candidate jong u snem 2021 u Bah A.L Mawblei bad ka Kong I.Kharwanlang ki la ïathuh ba ki ladep ban ïakynduh ïa u Myntri ka tnat Pule Puthi ka Sorkar Jylla u Rakkam A. Sangma ban pynsngew halor kane ka jingbym thungkam jong ka Sorkar hynrei na ka liang jong u Myntri u la ïathuh ba ka jingthungkam ïa kiba la pas ïa ka eksamin MTET kan dang shimpor sa katto katne.
“U la ïathuh ba ka tnat Pule Puthi jong ka Sorkar Jylla kan hap ban shu thungkam shwa ïa ki kum ki nonghikai shipor lane ban leh ïa kata ka Temporary Recruitment,” ong kine ki arngut ki nongïalam.
“Ngi la rai ban ym pdiang satia ïa kane ka Temporary Recruitment. ngi kwah ba ka Sorkar kan leh beit da ka Permanent Recruitment kumba ka la leh ïa ki First Batch,” ong u Bah Mawblei.
Haba kyrpad ïa ki paralok kiba la pas MTET ba kin long kiba ïai shah, u la ong, “ngi kyrpad ïa ka Sorkar lyngba ka tnat Pule Puthi ba kan thungkam noh ïa ngi tangba da ka Permanent Recruitment tangba kan shimpor katto katne bnai. Ngi ngeit ba ki para samla ki la ïakynduh jingeh baroh shikatta bad lada ngi ap sa tang katto katne bnai kan ym don shuh ka jingeh.”
U la ïathuh ba ki la kyrpad ïa u Myntri ka tnat Pule Puthi ba ka jingthungkam ka dei ban long katkum ki district khnang ba kan ym buh jingeh ïa ki nonghikai lada ka don jingïapher ha ka ktien ka thylliej.
“Ngi kyrpad ïa ka Sorkar ba ka jingthungkam ka dei ban long shwa ban pynlong biang ïa ka eksamin MTET kaba thymmai,” ula ong.
“Ngi kyrpad ïa ki para nonghikai ba kin ym pdiang ïa ka jingthungkam ka Sorkar da ka Temporary Recruitment namarba kan ktah shibun khamtam ïa ki para nonghikai kiba la jan poi sha ka rta ba la kut ka rta thungkam bad kan ktah shibun ïa ki kat haduh ban da kut ka Temporary Recruitment,” la ong u Bah Mawblei.
U la ong ruh ba lada ka Sorkar kam pdiang ïa kane ka jingkyrpad jong ki, kim banse ban shim da kiwei pat ki sienjam ban mih shakhmat haduh ban da ïoh ïa ka jingthungkam ba pura.
Ka Kong I.Kharwanlang haba bynrap halor kane, ka la ïathuh ba kine ki samla kiba la pyndep ïa ka MTET naduh u snem 2021 ki la ïakynduh lang na ka por sha ka por ban ïathir ïatai halor kane ka jingbym pat thungkam jong ka Sorkar bad ïathuh ruh ba ki la ïakynduh ruh ïa u Myntri ka tnat Pule Puthi jong ka Sorkar barim u Bah Lamkmen Rymbui hynrei ka jingïakynduh kam shym la seisoh satia.
“Hadien ha ka jingïakynduh ha u Nohprah, 2022 ruh kam shym la poi shaei shaei namarba ka la elekshon ka la jan. Ka por ka la shu sepei da ki bnai bad mynta ynda la kut ka elekshon ngi la kynduh ïa u Myntri ka tnat Pule Puthi hynrei u la ong ba ym pat lah ban leh eiei,” ka la ong.
“Kane ka la pynbitar ïa ngi bad ngim banse ban shim noh da kawei ka sienjam bad ngi dawa ïa ka Sorkar ban thungkam noh mardor namarba u Myntri ka tnat Pule Puthi u la pyntip hapoh ka Dorbar Mang Tyngka jong ka Iingdorbar Thawaiñ kaba dang shu kut shen ba ki don 1002 tylli ki post ha ki Govt. Lower Primary School bad 41 tylli ha ka Upper Primary, 125ha ka Secondary bad 51 tylli ha ka Higher Secondary bad baroh ki post kiba lait ki long 1219 tylli,” la ong shuh shuh ka Kong Kharwanlang.