7th Elite Men’s National Boxing Championship: Jop u Shiva Thapa, Amit Panghal bad u Bhalang Shadap na Meghalaya

Shillong, Naiwieng 27: Hadien lai sngi ba la ïaid ka rynsan ïakura 7th Elite Men’s National Boxing Championship, ki paidbah ka jylla ki ïoh ban sakhi ïa ka jingïakhun u Shiva Thapa, rangïakura ba la khur takma hynriew sien ha ka Asian Championship bad u Amit Panghal ba la khur takma ksiar ha ka Commonwealth Games 2022, ha kaba ki la lah ban sei madan ïala ka jong ka sap da kaba jop bad bteng sha kawei pat ka wat jong ka 7th Elite Men’s National Boxing Championship ba la pynlong ha SAI Indoor Hall hynne ka sngi.
Nalor kitei arngut, ka la don ruh sa kawei pat ka jingïakhun kaba la pynshongshit ïa u paid nongpeit kiba la wan sakhi ïa la u jong u rangïakura napoh ka jylla, u Bhalang Shadap, u ba la pynpaw ïa ka jingkhlaiñbor da kaba pynliem ïa u Enait Khan jong ka DNHDD (Dadra & Nagar Haveli, Daman & Diu) ha ka thup kyrdan welterweight 63.5-67kg.
Ha kane ka jingiakhun u Shadap um shym la ailad satia ïa u rangïakura ka liang pyrshah, ha kaba u la ïai bteng ban sangah tyngeh tad haduh ba la pynlong ïa u rephri ban pynsngeh noh ïa kane ka jingïakhun hadien ba u Khan u la mynsaw.
Kumba ka long mynta, u Shadap u la long u ba ba ar napdeng ki rangiakura ka Jylla ban jam sha ka wat kaba ar hadien jong u Badonkupar Synnah (light welterweight 60-63.5kg) u ba la jop hynnin ka Sngi U Blei.
Haba phai sha ka jingïakhun hynne ka sngi, u Panghal na na Services, uba long u lahduh ha ka Asian Games 2018, u la khur jingjop ha ka flyweight 48-51kg pyrshah ia u Shivaji na Maharashtra lyngba ka rai ki nongbishar.
Kumjuh ha ka por janmiet u Thapa na Assam u la iakhun tyngeh pyrshah ia u Abhinash Jamwal uba na Himachal Pradesh ha ka light welterweight 60-63.5kg bad hapdeng kane ka jingïakhun u la khur ïa ka jingjop da 4-3.
Une u rangiakura u la ioh ka jingkyrshan na kiba bun ki paidbah hynne ka sngi bad ha kaba kut u la lah ban khur ia ka jingjop ha kane ka jingiakhun ha kane ka nongbah.
Ym lah ban len ba u Jamwal u la long u rangïakura uba tbit ha kaba um shym la ailad ïa u Thapa ban shu jop suk. Hapdeng kane ka jingiakhun kaba itynnad, hynrei na ka liang ki nongbishar ki la rai jop ïa u Thapa na ka bynta ban pynhun ia ki paidbah nongkyrshan.
Kham hashwa ki la don ar ngut kiwei pat ki rangïakura ka Jylla kiba la ïakhun, hynrei ki la mad ïa ka jingshah rem.
U Melvin Malngiang ha ka featherweight 54-57kg bad u Sanjeev Maskut ha ka 46-48kg, ki la shah rem noh ha u Himanshu Srivas bad u Ram Naresh Patel, kiba la mihkhmat na Madhya Pradesh. Baroh ar ngut kitei ki rangïakura ka Jylla ki la ïakhun tyngeh, hynrei haba wan sha ka rai ki nongbishar ki la shah rem noh.